Usbaw sa pleti giplanohan

CEBU, Philippines – Tinguha sa usa ka grupo sa Sugbo nga moduso og petisyon aron mangayo og dugang usbaw sa pletihan sa pampublikong sakyanan aron himuon nang 9 pesos ang minimum gikan sa P7.50 tungod sa rason nga mibalik na og saka ang presyo sa produktong petrolyo.

Gibutyag kini sa chairman sa City Transport Integrated System Cooperative (CITRASCO) nga si Benjamin Yu tungod kay giingong P46 na usab ang presyo matag litro sa diesel gikan sa kapin P38.

Matud ni Yu dihang nahinabi sa Banat News plano pa lang kini tungod kay pakigtagboan pa niya ang ubang transport groups. Buot nilang maduso ang maong petisyon karong adlaw’ng Martes o sa Miyerkules ngadto sa Land Transportation Franchising and Regulatory Board-7.

Apan sa tinud-anay nabantayan sa Banat Manobela gikan gimando sa LTFRB-7 nga ibalik sa P7.50 gikan sa P8 ang minimum nga pletihan, walay drayber nga manukli og P.50 kung tunulan og P8 nga pleti, bisan estudyante ug senior citizen pa ang mibayad niini.

Gipasabot ni Yu nga ang mga drayber maoy naapektuhan og maayo niining nagsunod nga pagsaka sa presyo sa produktong petrolyo tungod kay ang ilang kinitaan adto naman mopaingon sa krudo ug abangan.

Mipadayag hinuon si Yu nga apil sa maapektuhan niini mao ang mga yanong mamumuo nga nagdawat lang og minimum nga suholan apan ang transport sektor nagping-it na usab sa kamahal sa petrolyo.

Ang tinguhang himuong P9 ang pletihan natumong usab nga nag-ungot pa gihapon ang petisyon sa usbaw sa suholan sa mga mamumuo diha sa Regional Tripartite Wages and Productivity Board -7. (EIM) BANAT NEWS