CEBU, Philippines – Usa ka maayong kalambuan ang pagbalik sa maayong kabubut-on nila ni Governor Gwendolyn Garcia ug Daanbantayan Municipal Mayor Luisa Loot.
Matud pa sa gobernador nga ang panag-uli nila ni Loot maoy usa ka maayong ehemplo ngadto sa mga leader kansang kabubut-on nagkasungi gumikan sa personal nga mga hinungdan. Malaumon si Garcia nga ang tawo nga buot nga mohimo og intriga sa maong hitabo, malipay. Si Loot sa samang higayon susama usab nga kalipay ang gibati niini sama kang Gobernador Garcia.
Gani iyang gipahayag ngadto kang 3rd district Representative Pablo John Garcia nga dili siya malimot sa amahan niini nga si Deputy Speaker Pablo Garcia sa ubos balay balaoranan sa gobernador pa kini sa lalawigan sa iyang pagpalambo sa lungsod sa Daanbantayan.
Sa samang higayon naglaum si Loot nga kun nahimo sa amahan sa mga Garcia ang paghatag kaayohan sa mga kalungsoran nga mao usab ang gihimo ni Gobernador Gwen, walay katarungan nga dili kini mahimo ni Cong. PJ kun molampus siya sa pagka-gobernador sa lalawigan.
Sa bahin ni Cong. PJ Garcia, kini miingon nga dako kaayo og mahimo ang personal nga relasyon nga maoy mopatigbabaw kay ang politika lumalabay lamang apan ang personal nga panagsuod ug panaghinigalaay molungtad hangtud sa kamatayon ug alang kaniya mao kini dakong pagtulun-an nga gusto niyang batonan sa tanang lokal nga opisyal sa kagamhanan.
Sa laing bahin iyang gitataw nga komplikado karon ang disisyon ni Bokal Peter John Calderon sa pagtapon niya sa laing partido kay si kanhi Danao City Vice Mayor Ramon "Boboy" Durano IV suod kaayo nga paryente sa mga Calderon.
Si Durano maoy opisyal nga kandidato sa pagka-bise gobernador sa One Cebu Party nga ka-tandem ni Cong. PJ Garcia. (WC) BANAT NEWS