Straw Bill suportado sa estudyante

CEBU, Philippines – Gikinahanglan nga may representante sa mga tinun-an sa panahon nga mag-miting ang mga nagdumala sa nagkadaiyang mga tunghaan.

Kini maoy gibutyag sa Cebu youth ambassador ug kasamtangang presidente sa Student Council Alliance of the Philippines nga si Guian Paulo Gedulfredo kinsa misaysay nga adunay ubang tunghaan karon nga mogama og mga palisiya nga wala’y konsultasyon sa mga representante sa tinun-an.

Mao kini ang hinungdan nga mihatag og init nga suporta ang maong grupo sa nag-ung-ong karon nga Students’ Rights and Welfare Bill (STRAW Bill) didto sa kongreso.

Gatosan ka mga student leader ang nagtigom didto sa Rizal Library ning dakbayan sa Sugbo nga nagtuki    bahin sa suporta nila sa maong balaudnon.

Sumala pa ni Gedulfredo nga importante kaayo ang tingog sa mga tinun-an kung adunay mga pamaagi nga himoon ang mga tagdumala sa mga tunghaan aron usab dili matumban ang ilang mga katungod.

Matud pa niya nga kung makapasar na ang Straw Bill, makakuha na og eksaminasyon kadtong mga tinun-an sa kolehiyo nga madelatar sa pagkuha og examination permit gumikan sa kakuwang sa ilang kuwarta.

Nagkanayon si Gedulfredo nga dili unta hikawan ang mga tinun-an sa pagkuha og eksaminasyon ilabi na kun ang hinungdan niini mao ang kaapiki sa kuwarta.

Nalatid usab sa Straw Bill ang anti-discrimination sa mga tinun-an sama sa kahimtang sa pagkatawo niini ug uban pa.

Nagkanayon si Gedulfredo nga daghan na unya nga mga kabatan-onan ang makahuman sa kolehiyo kung hingpit na nga makapasar ang Straw Bill. (WC) BANAT NEWS