Suspek sa bus robbery napusilan

CEBU, Philippines – Talandugon ang kahimtang sa usa ka gidudahang tulisan human kini mapusili sa kapolisan dihang giingong misukol sa mga awtoridad samtang kini gidala sa patrolcar human sa iyang pagkasikop alas-3 sa kaadlawon diha sa barangay Mabuli lungsod sa Tabogon.

Ang napusilan nailhan nga si Brian Garcia, 22, kinsa gidala sa tamblanan tungod sa samad pinusilan sa tiyan ug bukton.

Sa pakighinabi sa Banat News ni PO3 Epifanio Comendido Jr., sa Tabogon police misaysay kini nga si Garcia maoy usa sa ilang suspek sa pagtulis sa Ceres Bus niadtong milabay’ng semana.

Nakadawat ang kapolisan og impormasyong naa sa maong balay ang suspek maong giadto kini sa grupo ni Chief Insp. Lamberto Hibaya nga miresulta sa pagkadakop kaniya ug pagkasakmit sa usa ka armas nga kalibre .38 nga armas.

Apan matud pa ni Comendido samtang nagdagan padulong sa police station nakabuhi gikan sa iyang posas si Garcia ug giingong gisuwayan og ilog ang Armalite ni PO3 Alman Alcabal.

Si Hibaya daling mi-warning shot apan wala mopatuo ang suspek hinungdan nga iyaha kining gipusil, daling gidala si Garcia sa Vicente Sotto Memorial Medical Center ug padayon pang giobserbahan sa mga doktor.

Si Hibaya mibutyag sa Banat News nga iyang giunhan si Garcia tungod sa kabalakang mailog niini ang armas ni Alcabal ug mabutang na hinuon sila sa peligro. (EIM) BANAT NEWS