RAFI ug AGAAP mo-turnover og classrooms

CEBU, Philippines - Nakabaton na og mga bag-ong lawak saringan ug usab mga reference materials ang mga tinun-an sa kindergarten sa upat ka elementaryang eskuylahan sa lalawigan sa Sugbo.

Sukad sa Agosto 30 hangtud karong adlawa (Septiyembre 1) ning tuiga, gihimo sa Aboitiz Foundation, Inc. ug sa Aklat, Gabay, Aruga tungo sa Angat at Pag-asa (AGAAP) ang pagpang apud-apod sa maong mga gamit ug lawak-saringan diin tulo niini naa nahimutang sa Metro Cebu ug ang usa sa lungsod sa San Remigio. Si Jon Ramon Aboitiz nga presidente sa Ramon Aboitiz Group Foundation Inc. mipadayag sa iyang dakong pasalamat tungod sa mabungahong proyekto.

 Ang mga benepisyaryong makadawat sa maong eskwelahan mao ang Don Calixto C. Yongco Sr. Elementary School sa Tawason, dakbayan sa Mandaue; Garing Elementary School sa Consolacion, Sangat Elementary School sa San Fernando ug ang Punta Elementary School sa San Remigio.

Ang Aboitiz Foundation mitukod sa mga eskwelahan samtang ang National Bookstore ang mihatag sa mga basahon ug ubang mga reference materials, ang Uratex ang mihatag og furniture samtang ang AGAAP ang mipahigayon og training alang sa mga magtutudlo.

Sila si Aboitiz Foundation President Jon Ramon Aboitiz ug AGAAP Chairperson Pinky Aquino-Abellada nga igsuon ni Presidente Benigno Aquino III, ang nangulo sa turnover ceremony, uban ang mga Aboitiz Group executives, mga kadagkoan sa Department of Education (DepEd), sa lokal nga kagamhanan, ug ang mga prinsipal nga benepisyaryo sa maong eskwelahan.

Sumala pa ni Pinky Aquino Abellada nga Chairperson sa AGAAP nga nahinabi sa Banat News nga siya mapasalamaton usab tungod sa kahimsog sa ilang pag-alayon sa RAFI sa pag-umol niining maong proyekto.

Karong adlawa, mangulo usab sa turnover ceremony sa dakbayan sa Mandaue sila si Aboitiz ug Abellada ug lungsod sa San Remigio. Niadtong 2011, nagkasabot ang Aboitiz Foundation ug ang AGAAP alang sa katukoran sa 134 ka school buildings sa tibuok nasud sulod sa tulo ka tuig, 94 niini nahuman na ug sa sunod tuig humanon ang nahibiling 40 ka tunghaan. ( /EIM) - BANAT NEWS