Feeding program ipadayon

CEBU, Philippines - Sa tumong nga magpadayon ang pagkunhod sa kaso sa malnutrisyon, ang Department of Social Welfare and Development (DSWD) nagpadayon sa pagpatuman sa programa niini nga Supplementary Feeding Program alang sa mga tinun-an sa Day Care sa tibuok rehiyon sa Central Visayas.

Matud pa ni Regional Director Ma. Evelyn Macapobre gipundohan kini sa nasudnong kagamhanan og P10 milyones alang sa pagkaon sa mga bata nga menus og timbang.

Pipila sa hinungdan niining malnutrisyon mao ang kakuwang sa pagkaon, o kaha kanunay nga giduaw sa sakit sa lawas hinungdan nga kuwang sa timbang, sumala pa ni Macapobre.

Si Macapobre nga nahinabi sa Banat News mibutyag nga gipaningkamutan nila nga magpadayon kining maong programa nga gipahinungod ngadto sa tanang tinun-an sa Day Care.

Base   sa inisyal nga report, sa unang tuig nga implementasyon ning maong programa nasuta nga aduna pa gihapoy mga bata nga malnourish tungod lagi kay adunay ubang mga bata nga wala na mamintenar ang pagkaon

Dugang pa ni Macapobre nga sa pagkakaron mikubos na ang kaso sa malnutrisyon tungod kay pinaagi niining maong programa ilang nasuta nga kadaghanan sa mga bata nakabaton na og bug-at nga timbang.

Sa nasayran ang Supplementary Feeding program usa ka programa nga gawas sa regular nga gikaon sa bata, dugangan pa gayud kini og pagkaon pinaagi sa hot meals nga maoy girekomendar sa Food and Nutrition Research Institute (FNRI) nga angay ipakaon sa mga bata. ( /WC)   - BANAT NEWS