CEBU, Philippines - Talandugon ang kahimtang sa usa ka lalaki nga giunay pagpusil sa iyang ig-agaw didto sa sitio Soong 1, barangay Mactan, dakbayan sa Lapulapu sa miaging gabii.
Ang biktima mao si Ronald Malingin Aying, 33, minyo, nga usa ka mangungulit, samtang ang suspetsado mao si Raul Malingin, ig-agaw sa biktima, ug ang kauban niini nga nailhan lang sa ngalang Ramil, nga pulos silingan sa biktima.
Si PO2 Jocil Tejana sa kapolisan sa Presinto 1 sa Lapulapu City Police Office nga nagbase sa Mactan mibutyag sa Banat News nga naghigda ang biktima sulod sa usa ka PUJ nga giparking sa maong dapit.
Unya giingong miabot ang mga suspetsado ug sa walay igong hinungdan gipusil niini ang biktima.
Nasabak sa nagkalainlaing bahin sa lawas, nakapangayo PA og panabang ang biktima sa iyang inahan ug mga igsoon nga maoy mitabang dayon kaniya.
Gihatud dayon kini sa kabanay ngadto sa Mactan Doctors Hospital apan gibalhin usab dayon ngadto sa tambalanan sa dakbayan sa Sugbo gumikan sa upat ka bala nga mitaroy sa nagkalainlaing bahin sa iyang lawas.
Gisukit sa kapolisan ang biktima bahin sa hinungdan sa maong pagpamusil, apan miingon kini nga wala siya masayud sa motibo sa duha ka mga suspetsado sa pagpatay kaniya. ( /WC) - BANAT NEWS