CEBU, Philippines - Tulo ka mga lalaki apil na ang usa ka tinun-an sa maritime ang nadakpan sa pagpangronda sa kapulisan ug gidudahang tigpayuhot og ginadiling drugas human nakuhaan og daghang pinutos nga gidudahang shabu sa ilang posesyon diha sa sitio Tapon, sa barangay Napo siyudad sa Carcar niadtong Huwebes sa alas 11:30 sa gabii.
Ang mga nasikop mao sila si Joseph Sitoy, 27, molupyo sa Mantatong barangay Mangyaw; Teotimo Navasca, 24, tinun-an sa usa ka maritime school ug Nelson Ayondon, 40, nagpuyo sa maong dapit. Hinuon duna pay duha ka lalaking nakaeskapo ug wala madakpi sa gilusad nga operasyon. Si Sitoy nakuhaan sa iyang posesyon og upat ka gagmay’ng pakete nga gituohang shabu.
Si Navasca nakuhaan usab og lima ka paketeng gidudahang shabu ug laing lima ka pakete sa shabu ang nakuha usab sa posesyon gikan ni Dayondon ug mga kagamitan sa pagsuyop og ginadiling drugas. Matud ni PO1 Gennis Lamosao sa Carcar City Police Station dihang nahinabi sa Banat News nakadawat sila og tawag sa telepono ug mireklamong migara na og maayo ang mga drug pushers nga mga batan-on sa maong lugar.
Tungod niini si Chief Insp. Teodulfo Manatad nakig-alayon sa Philippine Drugs Enforcement Agency (PDEA)-7 ug gilusad ang maong operasyon apan dunay pipila nga nakadagan. ( /EIM) - BANAT NEWS