Aviatour mihangop sa klaripikasyon sa CAAP

CEBU, Philippines - Naibtan sa tunok ang mga kadagkuan sa Aviatour Air human giklaro sa Civil Aviation Authority of the Philippines o CAAP sa ilang pamahayag nga balido pa ang lisensiya sa maong tunghaan ug ang piloto niini nga si Capt. Jessup Bahinting atol sa pagkahagsa sa ilang abyon ug mikalas sa kinabuhi ni DILG Sec. Jesse Robredo, Capt. Jessup Bahinting (ang piloto ug tag-iya sa Piper Seneca plane) ug ang Nepalese co-pilot niini nga si Kshitiz Chand sa lalawigan sa Masbate duha ka semana na ang milabay.

Matud pa ni Capt. Antonio Juriedini ang Flight Director sa Aviatour Flying School nalipay sila sa pamahayag ni CAAP Chairman William Hotchkiss.

Base sa nakuhang dokumento sa Banat News pinetsahan Agosto 30, 2012 gikan sa buhatan ni DOTC Secretary Mar Roxas giklaro ni Hotchkiss nga ang mga abyon, piloto, commercial ug instructor pilots sa Aviatour balido ang tanang lisensya.

Matud pa ni Juriedini ang sayop nga balita nakahatag og negatibong impresyon ngadto kanila. Giklaro niyang nagsubay sila kanunay sa proseso tungod kay kinabuhi ang nalambigit sa maong matang sa patigayon.

Sa report sa TV Patrol Central Visayas kagahapon, ang 180 ka mga tinun-an sa Aviatour Flying School mipadala og petisyon ngadto sa CAAP nga naghangyong libkason ang suspensyon sa ilang tunghaan.

Base sa CAAP report, ang lisensya sa flying school sa Aviatour nag-expire niadto pang Agosto 29 ning tuiga, apan atol sa aksidente sa Piper Seneca balido pa ang ilang lisensya ug giklaro sa petisyon nga ang nalambigit sa aksidente dili ang flying school kondili ang chartered flight. ( /EIM)  - BANAT NEWS