Nangape naigo sa kilat

CEBU, Philippines - Patay ang usa ka mag-uuma nga padulong untang magkutaw og kape dihang kini gikatahong naigo og kilat atol sa pagbunok sa kusog nga ulan pasado ala-una sa hapon diha sa sitio San Miguel, sa Brgy. Taptap dakbayan sa Sugbo.

Ang biktima nailhan nga si Christopher Archua, 25, usa ka mag-uuma ug molupyo sa maong lugar.

Sa pasiunang imbestigasyon sa kapolisan nasayran gikan sa kapuyo ni Archua nga si Juvelyn Cabuena kusog kaayo ang pagbunok sa ulan niadtong tungora ug silang pamilya diha nagtapok sa ilang balay.

Apan tungod sa katugnaw miadto si Archua sa kusina nga nahimutang sa gawas sa ilang balay aron unta magkutaw og kape, mao na lay ilang nadunggan ang kalit nga lanog nga paglipak sa kalangitan.

Gikatingala na lang ni Cabuena sa iyang pagsusi sa gawas nga natumba na si Archua hinungdan nga dali siyang nangayo og hinabang sa ilang kasilinganan.

Apan, dihang ila na kini nga gisusi, wala na kini magginhawa pa ug dihang gisuwayan pagsusi ang pulso niini wala na usab kini magpitik pa.

Sa gipahigayong pakisusi sa kapolisan sa kalawasan ni Archua duna kini dakong paso sa tuong abaga nga daw giduslitan. Tungod kay nahitabo ang pagkatumba ug pagkamatay ni Archua atol sa paglipak tungod sa dautang panahon nagduda ang mga imbestigador nga naigo gyud kini sa kilat.

Gituohang mikatay sa kalawasan ni Archua ang liboang boltahe sa kuryente gikan sa kilat nga maoy nakaingon sa kamatayon niini.

Kahinumduman nga niadtong buwan sa Mayo ning tuiga aduna usab mananagat ang naigo sa kilat samtang kini namasol sa kadagatan sa barangay Colon syudad sa Naga.

Si Rolando Lim, 52, usa ka mananagat mao ray naigo sa kadaghan sa mga namasol sa maong bahina sa dagat nianang higayona, nabuslot usab ang luwang sa bangka niini.

Nasayran nga si Lim mipugos gayud og panagat niadtong higayona aron usab idugang sa pagpalit nila og tambal tungod kay nasakit ang asawa niini. (/EIM)   - BANAT NEWS