P100,000 nga shabu nasakmit
CEBU, Philippines - Ubay-ubay nga nagkadaiyang pakete sa shabu nga nagbalor og P100,000, armas nga revolver, ug listahan sa giingong mga utangan sa shabu ang nakuha sa mga operatiba gikan sa usa ka gipasanginlang tigpayuhot og ilegal nga druga kagahapon sa kaadlawon sa Barangay Bairan, Naga City.
Si Joel Zamoro, 41, taga-Barangay Langtad, gidakop sa mga operatiba sa Philippine Drug Enforcement Agency (PDEA)-7 sa estambayanan niini mga ala 1:00 sa kaadlawon.
Gisikop si Zamoro human kini mitunol og usa ka medium nga pakete sa shabu bugti sa P2,000 gikan sa poseur buyer. Laing nakuha gikan kang Zamoro mao ang 16 ka laing medium ug usa ka laing dakong pakete sa shabu, .38 revolver nga adunay upat ka bala, timbangan ug mga listahan.
Matud ni Intelligence Officer 1 Nicolas Gomez nga si Zamoro taud-taud nang gi-surveillance tungod kay magbalhin-balhin kini og lugar ug kagahapon lang nila kini masakpi.
Si Zamoro giingong level two nga drug pusher ug balwarte niini ang tibuok Naga City. “Dugay na ni nga moduwa pero karon lang ni dakpi sa Cebu,” matud ni Gomez.
Matud pa nga adunay kaso si Zamoro sa Mindanao apan i-verify pa sa operatiba kung unsa ang kaso niini. Sa laing bahin, si Zamoro miangkon nga iyahang tinuyuan ang maong salaud kay mao kini iyang pangita. “Mao naman gyud ni tinuyuan man,” matud ni Zamoro.
Anaa karon natanggong si Zamoro sa karsel sa PDEA-7 samtang mga kasong paglapas sa Sections 5 and 11 o RA 9165 ug illegal possession of firearms ang ipasaka sa suspek. ( EIM) - BANAT NEWS
- Latest
- Trending
