Tinun-an naghikog

CEBU, Philippines - Naghikog patay ang usa ka tinun-an sa usa ka kolehiyo sa siyudad sa Sugbo sulod sa usa ka apartment sa barangay Tungkop lungsod sa Minglanilla niadtong miaging gabii sa alas 10:00 ang takna. Ang gituohang nagpakamatay pinaagi sa paghikog mao si Paul Anthony Resaba, 21, nagpuyo sa Deca Homes sa barangay Tungkil, Minglanilla ug 1st year student sa kursong HRM.

Matud ni PO2 Hazel Tuason sa Minglanilla Police Station dihang nahinabi sa Banat News, si Resaba nakit-an nga patay nang nagbitay sud sa iyang giabangang lawak nga dunay higot nga habol nga gilubid sa liog ug ang pikas tumoy gihigot sa kisame.

Dali kining gitabang ug gihatod sa South General Hospital sa siyudad sa Naga apan gideklarar kini sa mga doktor nga patay na. Usa ka suicide note nga gibutang ibabaw sa lamisa nga dunay nakasuwat og mga pagpangayo og pasaylo sa iyang gibuhat ngadto sa iyang kapuyo ug sa iyang ginikanan.

Matud usab sa mga higala ni Resaba ngadto sa kapolisan nga sa wala pa ang hitabo namatikdan nila kining nag-away sa kapuyo nga si Babiecile Tago, 20. ( /EIM)  - BANAT NEWS