Serbisyo ni Buenafe sa CCPO palugwayan

CEBU, Philippines - Gibutyag kagahapon ni Mayor Michael Rama nga mopadala siya og komunikasyon ngadto sa ulohang buhatan sa Philippine National Police aron ma-extend ang pagserbisyo ni Senior Superintendent Melvin Ramon Buenafe isip hepe sa Cebu City Police Office.

Nasayran nga misumad na karong adlawa ang ikaduhang tuig nga paghupot ni Buenafe sa iyang puwesto ug mao kini ang “standard number” sa pagserbisyo sa usa ka hepe nga modumala og headquarter.

Hinuon wala pa kadawat si Buenafe og pormal nga kamandoan gikan sa iyang labaw. Apan si Rama misaysay kagahapon nga saludo siya sa performance ni Buenafe sa CCPO busa ipa-extend gyud niya ang pagdumala niini sa dakbayan.

Kahinumduman nga gidayeg ni Rama si Buenafe kaniadto gumikan sa malampuson nga pagdumala niini sa kahapsay ug kalinaw sa nangagi nga mga Sinulog.

Ang labing bag-o nga nabuhat ni Buenafe mao ang pagsulbad sa nahitabo nga hostage-taking sa miaging adlaw nga luwas nga nakasalbar sa usa ka 8-anyos nga bata gikan sa usa ka adis-adis.

Samtang si Buenafe sa iyang bahin, nagpasalamat kang Rama sa pagsalig nga gihatag niini kaniya.

Dugang pa niya nga makapadugang sa ilang moral ang gihimong pamahayag sa mayor ug gipasalig niini nga ipadayon niya ang maayong pagpangalagad sa siyudad.

Matud pa niya nga duna nay lima ka mga pangalang gipilian karon diin moagi usa kini og makuting proseso una mopili og bag-ong City Director.

Giklaro hinuon ni Buenafe nga kun unsa may mamahimong hukom sa iyang mga labaw, iyaha kini nga sundon. ( /EIM) - BANAT NEWS