Milambos patay sa bata gibuwag og karsel

CEBU, Philippines - Gibutang sa isolation cell sa Talisay City Jail sa barangay Maghaway sa dakbayan sa Talisay ang suspek sa paglambos-patay sa 2-anyos nga batang lalaki tungod sa kabalakang makapanakit kini sa ubang mga priso.

Si Chief Inspector Renante Rubio ang jail warden sa TCJ nagkanayon nga dihang iyang gisukit-sukit ang suspek nga si Kienner Baller, 35, maayo kining manubag apan dunay mga pangutanang dili niini tubagon ingon lang kining moingon og “ambot wala ko’y nahinumduman.”

Dihang gipangutana kini kabahin sa iyang kaso kini mitubag og “gipasanginlan man ko nilang mipuspos og bata maong ila kong gidakop wala man ko kahibalo ana ambot wala ko’y nahinumduman.”

Atol sa krimen gikatahong nasaghiran sa biktimang si Jeffrey Abusejo Jr. niadtong Martes sa hapon sa barangay Cansojong, dakbayan sa Talisay kalit niya kining giaswat ug gipospos hangtud namatay.

Dihang kini nadakpan sumala pa sa mga imbestigador nangangkon kining alien ang iyang gipuspos ug dili bata.

Matud sa jail warden nga base sa obserbasyon sa ilang jail nurse nga si JO3 Rey Larida ‘mentally unstable” si Baller maong nagplano silang hangyoon si Regional Trial Court (RTC) Judge Silvestre Maamo sa Branch 17 nga mapatan-aw kini sa psychiatric ward sa Vicente Sotto Memorial Medical Center.

Si Rubio nagkanayon nga kung ang resulta sa eksaminasyon sa psychiatrist nga dunay deperensiya si Baller sa pangisip ipadala niya kini ngadto sa Mandaluyong City National Mental Health Hospital.

Nabalaka si Rubio nga manakit og ubang priso si Baller ug kinahanglan usab kining bantayan og maayo sa kabalakang basin kini maghikog.

Sa wala pa ibalhin si Baller sa TCJ, si PO2 Leandro Azarcon ang jailer sa detention cell sa Talisay City Police Station nga nahinabi sa Banat News mibutyag nga ang usa ka detainee nga si Marlon Llamedo, 28, ang mitiyabaw sa kahadlok nga siya maoy isunod nga tuk-on ug paakon ni Baller ug mihangyong magpabalhin na ngadto sa Talisay City Jail sa barangay Maghaway.

Matud ni Azarcon si Llamedo kinsa dunay sakit nga tuberculosis wala nila mabalhin dayon sa TCJ tungod kay gihuwat pa nila ang resulta sa medical examination niini apan niadtong Miyerkules nabalhin na gyud kini ngadto sa TCJ.

Gibutyag ni Azarcon nga walay tulog ang mga detainee sa pag-abot ni Baller tungod kay nagbantay kini sa kabalakang tuk-on sila sama sa gibuhat niini sa laing inmate nga si Wendel Labuca, 30.

Si Labuca nakamata kini ug mibarog hinungdan nga nagkagubot diha sulod sa detention cell apan napakalma kini sa jailer apan nianang pagkakaadlawon laing inmate nga si Bobby Dela Rosa, 30, ang gituok gihapon ni Baller ug gisuwayan na og paak ang liog niini. Pagkahigmata ni Dela Rosa mikisikisi kini hinungdan sa subling kagubot nga mitumaw sa detention cell. Tungod sa maong mga hitabo giposasan na lang ni Azarcon si Baller aron dili kini makapasakit sa ubang inmate o ba kaha maoy tabangan og pasakit sa ubang mga piniriso.

Gawas niini gibutyag ni Azarcon nga si Baller magyaw-yaw nga mangamatay silang tanan apil na siya (Baller) tungod kay dunay mahitabong giyera. (/EIM)  - BANAT NEWS