LPG miulbo 10 naangol

CEBU, Philippines - Napulo ka tawo sagad kanila mga bata ang nalandig sa tambalanan human moulbo ang tangke sa Liquified Petroleum Gas (LPG) nga gidukdok diha sa usa ka junkshop sa sitio Paglaom barangay Calamba dakbayan sa Sugbo pasado alas-2 kagahapon sa hapon.

Ang mga biktima mao silang Kimberly Rama, 4, Alwina Montemayor, 5, ang inahan niini nga si Gwen Montemayor, Christina Mangubat, Bianca Rama,7, Junrey Douglas.

Sa report sa DyAB nakagawas na sa Cebu City Medical Center ang laing tulo nga napaso nga silang Germinia Templor, 26, Nico Templor, 7, ug Christina Sayong, 22.

Sagad kanila nakaangkon og 2nd degree burns ug 1st degree burns nga nakapahilos sa ilang mga panit sa bukton, batiis ug mga nawong.

Ang nagrabihan mao si Carlito Tampon, nga kasamtangang giatiman sa mga doktor sa CCMC kinsa gikatahong maoy nagkubikubi sa LPG aron unta ilang ipatimbang.

Sa pakighinabi sa Banat News ni Germalyn Rama, 23, inahan ni Kimberly misaysay sa Banat News nga si Tampon maoy nagdukdok sa tangke sa LPG aron limpyuhan una pa kini niya mapatimbang sa junk shop nga gipanag-iya ni Joel Ramos.

Matud pa niya nga samtang nagdukdok sa tangke si Tampon gikatahong adunay miaso gikan sa tangke ug pipila ka minutos ang milabay kalit lang kining miulbo nga dunay dakong kalayo.

Ang mga bata niadtong tungora dili layo sa nahimutangan ni Tampon ang naigo sa pagkilab sa kalayo hinungdan sa pagkapaksit sa ilang mga panit ug pagkasunog sa ilang mga sapot.

“Mi-aso gyud siya unya miulbo nga kalayo na sya diretso,” pasabot pa ni Rama dihang nahinabi sa Banat News.

Gani, ang panimalay nga atbang sa junkshop nasunog usab apan maayo na lang kay nadali ra usab kini sa mga molupyo ug sa kabomberohan nga nangabot.

Dako usab ang pagduda ni Rama nga gikaon sa kalayo ang maong aso tungod kay aduna may nagluto sa kilid duol sa nagdukdok nga si Tampon.

Apan ang fire investigator sa maong hitabo sa pakighinabi sa Banat News mibutyag nga ang spark gikan sa panagpingki sa duha ka metal sama sa martilyo ug sa tangke maoy nakaingon sa pagbuto tungod kay gidakop kini sa mihungaw nga nahibiling gas sa sulod sa maong tangke.

Si FO3 Emiliano Daño mipasabot nga dako kaayong imposible nga dakpon sa kalayo gikan sa nagluto ang mihungaw nga gas tungod kay ang dapit nga gidukdok ni Tampon sa LPG diha man mihungaw ang gas.

Sumala pa ni Daño, si Samuel Puyon maoy nanghulam og P3mil ngadto kang Ramos aron ipalit og mga scraps nga adto gihapon ibaligya kang Ramos, ug tulo ka LPG nga mga tangke maoy ilang napalit niini.

Giingong gilimpiyohan una kini ni Tampon tungod kay dili man modawat og dili pulos puthaw ang maong junk shop apan mibuto hinuon kini.

Samtang ang tag-iya sa junk shop nga si Joel Ramos, mibutyag usab dihang nahinabi sa Banat News nga andam siyang moabaga sa mga tambal nga iresita sa doktor sa mga nabiktima.

Pasabot pa ni Ramos nga wala niya sugoa si Tampon nga dukdukon ang maong LPG tank tungod kay dili man sila modawat niini.

Si Tampon nga nagrabehan sa maong insidente usa ka canvasser sa maong junk shop nga ang puhonan pinahulaman ra sa maong junkshop ug ang mapalit sa maong kwarta adto ibaligya kang Ramos. ( /EIM) - BANAT NEWS