Sinkhole sa Barili peligro gihapon

CEBU, Philippines - Ang Department of Environment and Natural Resources (DENR)7 miluwat og pasidaan sa taga Barili batok sa peligro sa bito o sinkhole nga nahimutang sa  barangay Mantayupan sa maong lungsod.

Ang maong pasidaan gihimo ni Geologist Abraham Lucero Jr. kinsa maoy senior science specialist sa Mines and Geosciences Bureau (MGB) sa DENR7 atol sa tulumanon sa Association of Government Information Officers (AGIO) Forum sa miaging adlaw.

Gimando ni Lucero sa mga opisyal sa lokal nga kagamhanan sa Barili nga butangan og mga dagkong karatola ang palibot sa maong bito aron walay mga tawo o kaha hayop nga makapaduol niini. Matud pa ni Lucero nga nagpaabot pa sila karon nga makapalit    og ground penetrating radar (GPR) nga maoy mosukod sa gilawmon ug gilapdon sa wanang sa ilawom sa maong bito.

Ang GPR mapalit lamang kini didto sa Manila ug mahal usab kaayo ang maong ekipo busa nagkinahanglan pa sila og igong budget alang niini, matud pa ni Lucero.

Dako og pagtuo ang maong geologist nga dili basta-basta ang peligro sa ilawom sa maong bito kay gani hangtod sa pagkakaron may 30 porsiyento pa sa tubig sa sapa sa Mantayupan ang gisuyop gihapon sa maong bito.

 Matud pa niya nga dili usab angay nga kompiyansahan ang pagtabon niini kay basin dako kaayo ang langob   sa ilawom unya matumpag kun mapatungan og mga bug-at ang ibabaw.

Gani gisubay ni Lucero nga ang hinungdan sa pagkalungag sa maong lugar mao ang pagkatandog niini sa dihang mag backhoe nga nangabra sa mga bato sa kilid sa sapa.

Nagtuo si Lucero nga ang kabug-at sa backhoe   nakatandog sa humok na nga yuta   kay nangalungag na ang ilawom maoy nahimong gatilyo sa pagkamugna sa maong sinkhole. Ang dugang peligro kun matumpag na usab ang maong bito mao ang mga kahumayan ug punong sa isda sa barangay Campanga nga nahimutang ubos   nga bahin sa Mantayupan ug maingon man ang Mantayupan Falls o busay nga mahubsan sa tubig. Si Lucero nagkanayon nga daan na nga may mga lungag-lungag ug humok na ang yuta sa ilawom sa maong lugar ug natandog kini malagmit sa dili pa dugay nga linog nga mitay-og sa Sugbo ug sa Negros Oriental sa milabay nga buwan.

Iyang gipasabot nga ang bito maporma sa mga lugar nga humokon og yuta nga sulod sa milyon ka tuig wala matandog ug nagpaabot lang kun molinog aron mahulpa. ( /EIM)     BANAT NEWS