Homeowners sa Apas magpatabang sa Malacañang

CEBU, Philippines - Mopadala og sulat ngadto sa buhatan ni Presidente Benigno Aquino III ang mga homeowners sa Barangay Apas aron mahatagan og kasulbaran ang ilang suliran nga mao ang pag-angkon sa hingpit sa luna nga dugay na nilang gipuy-an.

Sumala pa ni Apas barangay kapitan Ramil Ayuman human sa iyang pagbisita sa buhatan ni Gov. Gwendolyn Garcia kuyog ang mga opisyales sa homeowners associations sa iyang barangay nga ilang hangyoon si Aquino nga mointerbenir ug mohimo og lakang labot sa luna sa probinsiya nga nahipunta sa AFP Central Command.

Sumala pa niini nga ang mga sakop sa homeowners associations nalipay sa tinguha ni Garcia nga mapalit sa nagpuyo niini ang luna nga giokupahan niini nga gipanag-iya sa probinsiya sa Sugbo.

Apan dili na makapanghilabot ang probinsiya sa maong luna kay nadonar man sa kagamhanan sa lalawigan sa Sugbo ngadto sa AFP Central Command.

Ang maong luna diin nahimutang ang mga kabalayan sa nahisgutang mga asosasyon wala malakip sa gibakwi sa kagamhanan sa lalawigan sa Sugbo kay wala na kini magamit sa AFP Central Command sa operasyon niini. Matud pa ni Ayuman buot nga hangyoon sa mga residente ngadto sa presidente nga tugotan ang probinsiya nga mahatagan og katungod ang probinsiya sa Sugbo sa pagbaligya niini ngadto na mismo sa mga nagpuyo niini.

Hinuon gidugang ni Ayuman nga sa higayon nga dili patalinghugan sa presidente ang hangyo sa mga homeowners sa Apas, ang katapusan nilang opsiyon mao na lamang ang pagdangop sa korte. ( /EIM) BANAT NEWS