Dasmag sa motor 2 patay 6 angol

CEBU, Philippines - Duha ang patay ug pito ang angol sa dinasmagay sa mga motorsiklo sa managlahing dapit sa lalawigan sa Sugbo kagahapon sa udto ug niadtong Martes sa gabii.

Ang nakalas mao sila si Relle Nina Saladaga, 23, trabahante sa Swiss Sense Worldwide Inc. nga nahimutang sa Light Industrial Park, sa Maximo Patalingjug Ave, sa barangay Basak, dakbayan sa Lapulapu, ug Jeymar Pangandoyon, hingkod, minyo ug nagpuyo sa Candabong, Argao, kansang asawa ug anak atua na sa New York. Samtang ang mga naangol mao sila si Ramil Comcom, 22, taga lungsod sa Catmon, Cebu kaubang trabahante ni Saladaga, Jilber Cabalhug, 31, nga taga barangay Bangkal, dakbayan sa Lapulapu, nga drayber sa traysikol, ug Evelyn Toloneo, taga barangay Pajac, dakbayan sa Lapulapu, trabahante sa Mactan Export Processing Zone, ug pasahero ni Cabalhug; Jerry Lood, 47, minyo nga taga Sibulan, Negros Oriental, Gilbert Lood, 20, ug manghod niini nga si Jenrel Lood, 19, pulos ulitawo nga taga Argao. Si Saladaga nagsakay sa motorsiklo nga gimaneho ni Comcom dihang nadasmag kini sa usa ka traysikol nga gimaneho ni Cabalhug didto sa barangay Basak, dakbayan sa Lapulapu kagahapon sa udto. Ang namatyan ni Saladaga mao ang samad sa ulo niini dihang napantok sa sementadong karsada human kini malagpot gikan sa motor nga iyang gisakyan.

Samtang si Comcom nalagpot usab human kini dasmagi sa Isuzu trailer truck, nga gimaneho ni Cosme Item, 52, nga taga Urgelio St. dakbayan sa Sugbo samtang si Toloneo nga pasahero ni Cabalhug nahiagom usab sa mga pangos ug bun-og sa kalawasan ug silang tulo gihatud dayon ngadto sa Cebu City Medical Center. Si Saladaga gideklarar nga patay na sa paghiabot didto sa Mactan Doctors Hospital.

Samtang si Item, 52, gipaubos karon sa imbistigasyon sa kapolisan tungod sa pagkalambigit niya sa maong hitabo.

Sa laing bahin si PO2 Dionisio Trumata sa Argao Police Station mibutyag sa Banat News nga si Pangandoyon ug si Lood nga pulos nagmaneho sa tagsa-tagsa nila ka motorsiklo nagbiyahe paingon sa direksyon sa dakbayan sa Sugbo gikan sa Poblacion, Argao niadtong Martes sa gabii, dihang sa pag-abot nila sa sitio Candabong, barangay Binlod, sa maong lungsod nagkadasmag ang ilang mga sakyanan. Kini sa dihang pag-abot sa usa ka eskina sa maong dapit si Lood nga maoy nag-una, mikalit og desilya nga wala mohatag og signal. Naatol usab  nga maoy pag-overtake ni Pangandoyon busa nadasmagan kini ni Lood nga misangpot sa pagpangalagpot nilang tanan ug nasalibay uban sa ilang mga motorsiklo ug nila ni Gilbert Lood ug Jenrel Lood nga maoy angkas ni Jerry Lood. Nangabagnos sa karsada ug nangapantok ang ulo nga walay helmet sa sementadong karsada.

Si Pangandoyon maoy nagrabihan gumikan sa dakong samad sa ulo niini ug gideklarar nga patay na sa paghiabot didto sa Isidro Kintanar Memorial Hospital sa lungsod sa Argao.

Samtang sila si Lood ug ang duha niya ka angkas nakagawas dayon sa tambalanan human madapati og tambal tungod kay gagmay ra ang mga pangos niini sa lawas.

Si Lood   nagtingkagol karon sa prisohan samtang nagpaabot pa sa tukmang kaso nga iyang atubangon. ( /WC) BANAT NEWS