1,185 ubos sa 4Ps nakadawat hinabang

CEBU, Philippines - Mikabat sa 1,185 ka mga benepisyaryo gikan sa 14 ka barangay sa lungsod sa Malabuyoc ang nakadawat og tag P1,600 nga hinabang pinansyal ubos sa Pantawid Pamilya Pilipino Program (4Ps) usa ka programa sa Department of Social Welfare and Development (DSWD) 7 didto mismo sa Municipal Hall sa lungsod sa Malabuyoc kagahapon sa buntag.

Ang pagpang-apud-apod gipangunahan ni Regional Director Ma. Evelyn Macapobre sa DSWD 7 inubanan nila ni Jabee Binghay, Aileen Lariba ug uban pang mga opisyales sa DSWD.

Kini luyo sa nahitabong stampede sa miaging Biyernes didto sa Barili, silingang lungsod sa Malabuyoc.

Sumala pa ni Macapobre nga padayon nilang giapod-apod ang mga hinabang ngadto sa mga benepisyaryo sa 4Ps tungod kay gihatagan man sila og pagtugot ni Secretary Dinky Soliman bahin niini.

Si Macapobre mibutyag sa Banat News nga gimandoan sila ni Soliman sa pagpanghatud sa mga hinabang ngadto sa mga benepisyaryo sa 4PS sa mga lungsod sa Malabuyoc ug Ginatilan nga mao usab ang ilang gituman.  

Matud pa ni Macapobre nga ila nang gipadala ang report ngadto sa buhatan sa Department of Interior and Local Government (DILG) ug nakig-alayon usab sila sa National Bureau of Investigation (NBI) sa pag-imbistigar sa kaguliyang ug kagubot nga nahitabo didto sa Barili sa miaging adlaw atol sa pagpang-apud-paod usab nila sa mga hinabang ngadto sa mga benepisyaryo sa 4Ps sa maong lungsod.

Dugang pa ni Macapobre nga makig-set-in siya sa taga NBI karong adlawa aron ila gayud nga kahisgotan ang nahitabong stampede sa lungsod sa Barili aron sayron kun kinsay nagpasiugda niini.

Ang imbistigasyon maghatag og kompiyansa sa mga tinugyanan sa Land Bank of the Philippines sa pagpagawas sa kuwarta alang sa mga benepisyaryo sa 4Ps. Gani ang lima ka teller sa Landbank uban sa teller sa Cebu Court of First Instance Cooperative (CFI) maoy nangunay sa pagpanghatag sa kwarta ngadto sa mga benepisyaryo sa 4Ps. ( /WC) - BANAT NEWS