CEBU, Philippines - Gibayran na sa Philippine Crop Insurance Corporation (PCIC) sa ilang mga benepisyo ang mga mag-uuma sa lungsod sa Barili ug Dumanjug kinsa gipaubos sa insurance coverage sa kagamhanan sa lalawigan sa Sugbo.
Sila si Gobernador Gwendolyn Garcia ug PCIC Regional Director Crecencio Delijero maoy mihatud sa kwarta sa mga hingtungdan atol sa ilang pagbisita sa nahisgutang lugar niadtong Biyernes.
Usa ka Glen Robledo nga taga barangay Kambanog sa Dumanjug nakadawat og P4,323 isip bayad sa namatay niyang baboy ubos sa Special Comprehensive Insurance Program for Agri-Fishery Projects and Stakeholders.
Sila si Lorena Boquecosa ug Emilia Reducto, pulos taga Barangay Kantangkas, Dumanjug, nakadawat usab og P52,000 matag usa isip insurance sa namatay nilang bana.
Ang P50,000 isip accidental death benefit ug P2,000 isip burial assistance.
Ang bana ni Boquecosa nga si Capistrano namatay sa aksidenti sa motorsiklo niadtong Hulyo 24, 2012.
Dugang P10,000 ang gihatag nga automatic death benefit isip magtatanum og mais. Samtang ang bana usab ni Reducto nga si Primitivo usa ka sakop sa barangay lupong tagapamayapa kinsa namatay niadtong Hulyo 13, 2013 kay nalumos.
Ang Barili Rice Farmers Irrigators Association nakadawat usab og P25,312.79 gumikan sa dakong kadaot nga nahiagoman sa ilang humayan sa miaging bagyo.
Gitinguha sa kagamhanang probinsiyal nga 80 porsyento sa mga mag-uuma ug mananagat sa lalawigan ang mapaubos sa insurance sa PCIC niining tuiga lakip na sa ilang binuhi nga kahayopan, tanum ug kahimanan.
Mokabat sa 40,000 ang mga rehistradong mga mag-uuma ug mananagat sa tibuok lalawigan sa Sugbo.
Matud pa ni Garcia nga 20 ngadto sa 25 porsyento na ang napaubos sa insurance coverage sukad gilusad ang programa niadtong naghinapos nga bahin sa miaging tuig.
Ang Kapitolyo maoy mibayad sa premium nga P35 ug may insurance coverage na kini nga P50 mil ug P5 mil nga medical reimbursement. (BANAT NEWS)