CEBU, Philippines - Kritikal ang kahimtang sa 54 anyos nga lalaki human mabunal ang ulo niini nga walay helmet sa punoan sa manga nga gidasmagan sa motorsiklo nga iyang gisakyan didto sa barangay Dayhagon sa lungsod sa Medillen niadtong Domingo sa udto.
Ang biktima mao si Salvador Ursal, 54, minyo, nga taga barangay Maya, lungsod sa Daanbantayan.
Si PO3 Rolland Robin sa Medillen Police Station mibutyag sa Banat News nga ang biktima kusog kaayong mipabulhot sa iyang motorsiklo kansang ulo hayahay kaayo kay walay helmet gikan sa amihanang bahin paingon sa siyudad sa Bogo.
Apan sa pag-abot niini sa nahisgutang lugar kalit lang nawad-an sa preno ang iyang sakyanan busa iya kining gipatipas ug gipadasmag sa punoan sa manga sa daplin sa karsada.
Gumikan sa kakusog sa iyang dagan maayong pagkabunal ang iyang ulo sa maong kahoy dayon nalagpot siya ug nabuwag sa iyang sakyanan.
Ang mga molupyo na sa maong lugar maoy nagtinabangay pag-alsa sa biktima kansang lawas nabulit sa mga samad, pangos ug bun-og ug gihatud ngadto Verallo District Hospital sa siyudad sa Bogo.
Apan ang mga doktor sa maong tambalanan mirekomendar sa pagpaderetso sa maong biktima sa tambalanan sa dakbayan sa Sugbo aron pagtino kun wala ba maunsa ang ulo niini human mabunal sa kahoy. (BANAT NEWS)