Benepisyaryo sa 4Ps pilian para award

CEBU, Philippines - Ang Department of Social Welfare and Development (DSWD)-7 uban sa Jollibee Foods Corporation, Inc.(JFCI) mopili og mga Filipino nga mahimong modelo sa ilang ika-duhang Jollibee Family Values Awards (JFVA) sa karong sunod buwan .

Sayo niini mihangyo ang Jollibee sa DSWD-7 sa pag-nominate ni bisan kinsa nga pamilyang Filipino nga gihulagway nga adunay positibo ug maayong kinaiya ug disiplinado gikan sa mga benepisyaryo sa Pantawid Pamilyang Pilipino Program(4Ps) sa Central Visayas.

Lima ka pamilyang Filipino ang makadawat og ganti nga tag P100,000 uban sa tropeyo nga gidisenyo sa nabantog na nga si Brass Sculptor Michael Cacnino ug ilakip sila sa plantilya sa JFVA.

Ang mahimong mananaog pagapilion sa mga banggiitang mga hurado sa JFCI.

Ang mga nominado kinahanglang lumad nga Filipino nga maayo og kinaiya ug pamatasan ug walay kriminal nga rekord.

Ang mga nomination form mahimong ma-download sa opisyal nga website sa Jollibee ug ang deadline sa pagsumiter sa mga entries kutob lamang sa Agosto 31 ning tuiga. (BANAT NEWS)