Duha patay sa bangga

CEBU, Philippines -  Duha ang nakalas sa managlahing aksidente sa kadalanan sa siyudad sa Danao ug silingang lungsod nga Liloan diin usa sa nakalas 15-anyos nga nanilhig daplin sa dalan kagahapon.

Sa Danao, misampak ang usa ka motorsiklo sa gikasugat nga truck van sa highway sa sitio Tabok sa barangay Maslog alas 10:45 kagahapon sa buntag nga miresulta sa kamatayon ni Nelson Abelo, taga barangay Poblacion sa lungsod sa Compostela.

Mitahan hinuon sa iyang kaugalingon ang drayber sa Isuzu refrigerated van nga si Lino Garro, nga kawani sa 7D Mangoes nga nagbase dinhi sa dakbayan sa Sugbo.

Subay sa imbestigasyon ni SPO1 Renante Manulat, traffic investigator sa Danao City Police Station dihang nahinabi sa Banat News misuway og overtake ang motorsiklo sa gisundang multicab apan naatol nga maoy pagtumaw sa gikasugat nga trak hinungdan nga nagkadinasmagay.

Si Abelo nalabay buwag sa motor ug didto na motugpa sa gutter ug gitabang pagdala sa Danao City District Hospital apan gideklarar nga dead on arrival (DOA).

Sa laing aksidente, nakalas ang 15-anyos nga si Gabriel Tagalog samtang talandugon ang 40- anyos nga si Fe Delgado human ma-hit and run sa usa ka multicab pick up samtang ang duha nanilhig daplin sa karsada sa sitio Landing sa barangay Catarman lungsod sa Liloan niadtong Sabado sa alas 6:05 sa gabii.

Nailhan hinuon ang nakadasmag sa duha nga maoy nagmaneho sa Suzuki multicab pickup nga may plakang GRC-724 nga si Alberto Seroy, taga Poblacion, Liloan kinsa drayber sa kanhi mayor sa maong lungsod. Matud ni PO3 Renato Pindo ang desk officer sa Liloan Police Station dihang nahinabi sa Banat News diha ra sa daplin sa dalan nanilhig ang mga biktima dihang gidaro sa maong sakyanan.

Gikatahong misaliring sa daplin sa dalan ang multicab kansang drayber gidudahang hubog niadtong tungora. Niadtong tungora nagdungan pagpanglimpyo ang mga molupyo sa nahitaboan ug maayo na lang nakalihay ang ubang mga tawo gawas sa duha.

Ang duha gidala sa Velez Hospital sa dakbayan sa Sugbo apan namatay ang bata tungod sa grabing kadaut sa ulo ug lawas.

Si Seroy mieskapo ug mipabulhot sa multicab apan nailhan kini sa mga estambay ug nakuha ang plaka niini hinungdan nga kini natultulan sa mga polis ug gidakop.  (BANAT NEWS)