3 mil mihatud sa lubong ni Bahinting

CEBU, Philippines - “He was a God’s gift.” Mao ni ang sagad nga paghulagway sa mga kahigalaan ni Captain Jessup Bahinting kaniya atol sa paghatag nila og testimonya sa pagkatawo sa mitaliwang piloto sa iyang haya kagahapon sa hapon pipila ka oras sa wala pa kini ilubong sa Ginatilan cemetery sa Barangay Poblacion.

Lakip si kanhi senador Miguel Zubiri nga gikan pa sa Dumaguete ang mitambong ug miangkong daghang mga pabor nga nahatag kaniya si Bahinting dihang midagan siya pagkasenador niadtong 2007 elections. “He told me not to pay for his service but only to provide gasoline for his plane, he was one of a kind,” matud pang Zubiri. Si Pastor Benjamine Sol, sa Grace Communion International, diin masakop ang mga Bahinting mihulagway sa naulahi nga maayong ehemplo sa uban tungod kay misunod gyud kini sa mga sugo sa Kahitas-an.

Si Paul Montenegro, ang suod nga higala ni Bahinting sukad sa pagkabata miingon nga usa ka maayong higala nganha kaniya ang piloto bisan sa katapusang higayon.

“He was there when my father died until the end and now here I am in his wake,” matud pa niya.

Samtang si Pastor Romy Pusta, kinsa maoy midawat kang Bahinting sa ilang simbahan niadtong 1976 miingon nga angayang di kahadlokan ang kamatayon sanglit mao kini ang gasa sa Diyos alang sa bag-ong kinabuhi.

“We grieve his death as a man who touched several lives but we have to be joyous for it was an assurance that he will experience what God has promised,” matud pang Pusta.

Gibanabana sa kapolisan nga 3,000 ka tawo ang mihatud sa lubong ni Bahinting. Diha usab sa paglubong ang mga higala, kabanay ug mga tinun-an sa Aviatour Air nga mibuhi og puting ballon agi og pagpanamilit sa ilang magtutudlo. (BANAT NEWS)