Pagpasuga sa kabukiran OK ni Gullas

CEBU, Philippines - Suportado ni Kong. Eduardo Gullas ang programa sa Department of Energy sa pagpasuga sa mga hilit nga mga dapit. Si Energy Secretary Jose Rene Almendras kinsa usa ka Sugbuanon nipresentar sa iyang 2013 budget proposal atubangan sa House Committee on Appropriations diin sakop si Gullas.

Gipasalig ni Almendras nga ang tanang magbabalaud sa Kongreso lakip na sa mga partylist ang makadawat sa Compact Fluorescent Lamps (CFLs) alang sa electrification program sa nasud. “Energization of sitios is the most important electrification project,” matud pang Gullas.

Matud pa ni Almendras nga adunay 3.6 milyones ka CFL ang ipangapod-apod ngadto sa 1.165 milyones ka panimalay ubos sa Philippine Energy Efficiency Project (PEEP) CFL Distribution - National Residential Lighting Program. Ang CFLs ipangapod-apod ngadto sa 182 ka distrito lukop nasud ug sa mga ginsakupan sa 51 ka Party-list ug 17 ka rehiyonal nga buhatan sa Department of Social Welfare and Development (DSWD) sugod sunod buwan. Matag panimalay hatagan og tag duha ka CFL nga suga apan nangayo og pasaylo si Almendras sa kalangan sa pagpangapod apod niini. (BANAT NEWS)