Anak og opisyal namusil

CEBU, Philippines - Panag-ilog sa kabilin nga balay miresulta sa pagkaangol sa usa ka ginang nga giunay og pusil sa iyang pag-umangkon niadtong Sabado sa gabii pasado alas-9 diha sa barangay Salag lungsod sa Tabogon.

Ang biktima nailhan nga si Luzminda Honares, 47, samtang ang suspetsado mao ang pag-umangkon niini nga si William Manluluyo.

Sa pakighinabi sa Banat News sa hepe sa kapolisan sa lungsod sa Tabogon nga si Insp. Lamberto Hibaya mibutyag kini nga niadtong Sabado sa gabii naabot ang biktima gikan sa Malaysia.

Apan nakurat kini tungod kay kandado ang main gate niini hinungdan nga mikatkat na lang siya sa koral ug gibuak ang kandado sa gate niini, dangtan pila ka minutos naabot ang suspek kinsa mao nay nagpuyo sa panimalay ug nasuko sa pagguba sa biktima sa kandado niini.

Tungatunga sa panaglalis napusilan sa suspetsado ang iyang iyaan sa ulo kinsa gidala sa Vicente Sotto Memorial Medical Center tungod sa kagrabe sa kahimtang niini.

Matud pa ni Hibaya nga naglalis ang duruha ug pulos nangangkong maoy may katungod sa balay nga kabilin sa ginikanan sa biktima niadtong 2010.

Apan dihang milarga sa ubang nasud ang biktima gipulihan kini sa suspek og puyo sa maong balay.

Mihangyo si Hibaya sa amahan sa suspetsado nga si Insp. Anecito Manluluyo nga agnihon ang anak nga motahan, hinuon mipasalig ang amahan ngadto ni Cebu Provincial Police Office Director Patrocinio Comendador nga motabang nga motahan ang iyang anak. (/EIM) (BANAT NEWS)