Legasiya ni Robredo magpadayon

CEBU, Philippines - Si Department of Interior and Local Government (DILG-7) Regional Director Ananias Villacorta mipadayag nga ang sunod nga mahimong DILG secretary maoy mopadayon sa legasiya ug maayong binuhatan ni anhing kalihim Jesse Robredo.

Matud pa ni Villacorta nga si kinsa may molingkod isip DILG secretary susama unta kini og kinaiya ni Robredo ug nga ang tanang nasugdan na ni Robredo alang sa kalamboan sa nasud ug alang usab sa kalamboan sa maayong panggobyerno sa tanang mga lider magpadayon pa unta.

“Nanghinaut mi nga mapadayon unta ang mga maayong binuhatan nga nasugdan ni Sec. Jess ug ila unta nga ipadayon ang mga lakang nga iyang nahimo,” matud ni Villacorta.

Iya usab nga gisaad nga ang DILG-7 magpadayon nga mo-implementar sa tanang proyekto nga nasugdan ni kalihim Robredo alang sa kalamboan sa rehiyon ug sa nasud aron masiguro nga ang maayong panggobyerno maoy mapahimuslan sa tanan.

Sa miaging pipila ka adlaw ang DILG-7 migahin og panahon sa paghandom nila sa mitaliwan nga kalihim sa DILG agi og simpatiya sa kagul-anan ug sa pagbangutan sa tanan sa pagkamatay niini.

Ang mga opisyales ug representante nga nagagikan sa nagkadaiyang ahensya sa gobiyerno ug usab mga lokal nga miyembro mitambong sa usa ka misa nga gipahigayon sa buhatan sa DILG7.  (BANAT NEWS)