Kadagatan sa Sugbo luwas sa red tide

CEBU, Philippines - Gibutyag ni Dr. Alice Utlang, hepe sa Department of Veterinary Medicine and Fisheries   nga luwas ang mga isda nga gipamaligya dinhi sa siyudad sa Sugbo gikan sa gikabalak-ang paghugpa sa red tide. Matud pa ni Utlang nga luwas kanunay sa red tide ang kadagatan sa Sugbo apan gipasalig niini nga higpit gihapon kaayo nila kining gimonitor.

Midugang si Utlang nga gawas sa kadagatan, ang mga isda mismo nga ihandos gikan sa mga kapuloan sa lalawigan paingon nganhi sa merkado sa Pasil sa dakbayan sa Sugbo, higpit usab nilang gibantayan. Matud pa niya nga kasagaran sa itumod nga isda nganhi sa Sugbo naggikan sa kasikbit nga mga lalawigan sama sa Bohol o kaha sa Negros.

Hinuon nagkanayon si Utlang nga nagpadayon karon ang kooperasyon sa iyang buhatan sa City Market Office, Bureau of Fisheries and Aquatic Resources (BFAR) ug sa Bantay Dagat Commission. Gipadayag hinuon ni Utlang nga wala pa siya’y nadawat nga advisory bahin sa hulga sa red tide sa mga lugar dinhi sa Kabisay-an nga maoy tinubdan sa mga isda nga itumod dinhi sa siyudad.

 Aron masiguro gayud nga limpyo ang isda, kinahanglan nga hugasan kini og tarong sa dili pa kini lutoon, sumala pa ni Utlang.

“Sa pagka-karon, okay kaayo kan-on ang atong mga isda. Dili man kay permi moigo sa atong lugar ang red tide apan padayon gihapon nga mo-monitor niana ang BFAR ug motabang pud ang DVMF,” sumala pa ni Utlang. Ang red tide usa ka klase sa organismo sa dagat nga pula ang kolor nga sayon kaayong motapot sa lawas sa isda ilabi na sa hasang niini ug labaw sa tanan sa kinhason.  (BANAT NEWS)