Buhatan sa PDEA ibalhin sa Lahug

CEBU, Philippines - Gikatakda na ang pagbalhin sa Philippine Drug Enforcement Agency-7 sa bag-o nilang buhatan sa Sudlon, Lahug, dakbayan sa Sugbo karong Septiyembre 17.

Kini natakda atol sa pagpakigtagbo ni PDEA-7 Director Jigger Montallana kang Gob. Gwendolyn Garcia human makompleto ang pag-ugmad sa edipisyo nga gigastohan sa kagamhanang probinsiyal balor og P7.8 milyones.

Ang bag-ong buhatan sa PDEA-7 nahimutang tupad sa Cebu Provincial Police Office (CPPO) nga gipatukod usab sa kagamhanan.

Laing buhatan nga gipaugmad gihapon sa kagamhanang probinsiyal mao ang crime laboratory sa Criminal Investigation and Detection Group (CIDG) samtang hapit na usab mahuman ang iya sa National Bureau of Investigation (NBI) nga anaa gihapon sa luna nga gipanag-iya sa Kapitolyo.

Sayo niini, si Garcia nagkanayon nga ang pagtanyag niya og bag-ong buhatan sa PDEA maoy katumanan sa iyang saad sa hugot nga suporta sa ahensiya nga maoy nangulo sa kampanya batok sa ilegal nga drugas.

Matud pa ni Montallana nga naghinamhinam na sila nga makabalhin sa bag-ong buhatan diin usab nila ipahimutang ang ila mga modernong kahimanan.  (BANAT NEWS)