CEBU, Philippines - Moabot sa P400 mil nga kinatibuk-ang halin sa usa ka delivery boy ang nasakiyo human kini gitulis sa mga tulisan nga gidudahang taga Leyte nga nangigo sa barangay Tajao lungsod sa Pinamungajan alas 4:00 sa hapon niadtong Sabado.
Ang biktima mao si Allan Munoz, 40, taga Bulacao siyudad sa Sugbo ug driver- collector sa Vinson Commercial Corporation nga nagbase dinhi sa dakbayan sa Sugbo.
Duha ka mga lalaki ang gitumbok nga mitulis sa biktima nga gituohang mga sakop sa notadong mga tulisan gikan sa Villaba Leyte robbery gang nga naglihok dinhi sa Sugbo.
Matud ni Insp. Raymund Enriquez, hepe sa Pinamungajan Police Station dihang nahinabi sa Banat News naghatud sa mga produkto ang biktima sa tindahan ni Tirso Fernandez daplin sa dalan. Apan dihang nanaog ang biktima aron magkwenta sa bayranan sa maong tindahan kalit nga miabot ang duha ka lalaking luwan og kolor itom nga Honda XRM ug ang angkas nanaug ug miduol sa biktima dayung tion og armas ug mideklarar og tulis.
Human niini gibunlot sa tulisan ang gibitbit nga bag sa biktima kinsa niadtong tungora wala makalihok tungod sa kakuyaw ug ang tulisan mibalik og sakay sa nagpaabot nga kauban ug mipabulhot padulong sa siyudad sa Toledo.
Ang biktima igo na lang midangop sa kapulisan, ang sulod sa bag P200 mil nga kwartang koleksyon ug laing P200 mil nga tsekeng bayad usab sa iyang mga kustomer.
Matud ni Enriquez insakto gyud ang kantidad nga nasakiyo sa biktima base sa rekord sa koleksyon niini nga ilang gisusi, hinuon ang tseke dali rang mapa-kanselar aron dili na mapailisan.
Si Enriquez mibutyag nga nagduda silang sakop sa Villaba Leyte rob gang ang mga tulisan nga nag-operate sa maong lungsod ug kasikbit nga kalungsoran. (BANAT NEWS)