Bahinting gisugat sa mga kabanay ug kahigalaan

CEBU, Philippines - Gisugat sa iyang mga kabanay ug kahigalaan sa lungsod sa Ginatilan ang patay’ng lawas ni Captain Jessup Bahinting kagahapon pag-abot niini pasado alas- 3 sa hapon sa barangay San Roque.

Sa maong lungsod naggikan ang kapikas ni Bahinting nga si Margarita.

Ang lawas sa maong kapitan temporaryong ibutang sa function room sa beach resort nga gipanagiya sa pamilya alang sa usa ka gabiing haya ug ilubong kini karong adlawa sa Ginatilan cemetery, sa Barangay Poblacion.

Mga paryente, amigo, ug silingan sa pamilya naghilak dihang naabot na ang patay’ng lawas sa kapitan. Matag usa kanila wala’y laing mahinumduman kung dili mao ang kaayo sa kapitan.

Matud ni Bernabela Matas, 76, nga si Bahinting ang usa sa mga pinakamaayong tawo nga iyang nakaila nga dako og natabang nila ug sa komunidad.

Si Jesus Larot, 61, ig-agaw ni Bahinting nga gikan pa sa Larena, Siquijor, mibutyag nga grabe ang natabang ni Bahinting kanila bisan sa financial nga tabang.

 Si Larot personal nga mianhi sa Sugbo gikan pa sa Siquijor.

 Sa laing bahin, si Margarita mi-deny sa alegasyon nga expire ang license to fly ni Bahinting. “They are putting down my husband and all those allegations are not true and I don’t know where they get it,” matud ni Margarita.

Matud niya nga niadtong Marso lang nag-renew iyang bana. Bisan pa man sa mga pagpangdaot, si Margarita mapasalamaton sa tanan nga nitabang ug misuporta nila.  (BANAT NEWS)