Mini nga kuwarta midagsang sa Mandaue

CEBU, Philippines - Midagsang sa dakbayan sa Mandaue ang mini nga kuwarta karong naghinangat na ang election sumala pa ni PO2 Brendo Mendoyos sa Presinto 4.

Matud pa ni PO2 Mendoyos nga nahinabi sa Banat News nga ila nang gisentro karon ang ilang pagpaniid sa mga sindikato nga tigpakatap og mini nga kuwarta kansang dali nga malingla mao ang mga tindera.

Matud pa ni PO2 Mendoyos nga usa sa mga biktima mao ang tindera sa usa ka tindahan sa dalan M. L. Quezon sa barangay Maguikay sa maong dakbayan kinsa nagdumili nga imantala ang iyang ngalan sa newspaper.

Giasoy sa tindera nga usa ka lalaki mipalit sa iyang baligya ug ang gibayad tibuok P200 nga papel.

Human madawat sa tindera ang kuwarta misirit dayon ang maong tawo ug misakay sa nagpaabot kaniyang motorsiklo.

Unya dihang gitandi sa tindera ang maong kuwarta sa uban nga sama gihapon og denominasyon, iyang nasuta nga mini ang maong kuwarta.

Matud pa ni PO2 Mendoyos nga paglabay sa pipila ka oras tindera na usab sa bakery sa dalan A.S. Fortuna sa barangay Banilad ang miduol kanila ug misumbong sa susamang kasinatian sa unang tindera   

Giasoy usab sa maong tindera nga nagsakay gihapon og motorsiklo ang wala hiilhing tawo nga mipalit og pan nga bali og P25 ug ang kuwarta niini, P500.

Unya human niya kini suklii, dali kaayong nakabiya sakay sa ilang motorsiklo ang lalaki unya paglabay sa pipila ka gutlo natino niya nga mini diay ang nadawat niyang P500 gikan sa maong tawo.

Si PO2 Mendoyos miingon nga sagad nga modagsang ang fake nga kuwarta kun magkaduol na ang piniliay.

Sa pagkakaron padayon na nilang gipanid-an ang mga tawo nga nagpasiugda niini, matud pa ni Mendoyos. ( /WC) - BANAT NEWS