Presinto 1 sa kapolisan sa Mandaue nabaho

CEBU, Philippines - Gawas lamang kun mahatagan og solusyon sa kagamhanan sa dakbayan sa Mandaue, peligro kaayong mohugpa ang sakit sa mga polis ug mga piniriso sa buhatan sa Police Station 1 sa Mandaue City Police Office tungod sa kakuwang sa supply sa tubig sa maong dapit.

Matud pa sa mga polis sa maong buhatan nga ang nagdala og bida sa kabaho sa ilang opisina mao ang mga piniriso kinsa walay pansayan.

Usa ka polis nga nagdumili nga mopaila sa iyang ngalan sa pamantalaan nagkanayon nga dugay na silang nag-antos niini.

Nabalaka na sila nga taptan sila og mga sakit gumikan sa kabaho sa ilang palibot.

Kasagaran sa mga mapriso sa ilang buhatan, walay kukaligo ug tungod kay walay pansayan bisan asa lang idam-ok ang ilang hugaw nga puston og plastic.

Hinuon kun makalugar adto isalibay sa basurahan nga kun dili usab dayon mahakot, tanang tawo nga moagi sa maong lugar magkulismaot ang dagway sa hilabihang kabaho.

Ang baho sa ihi ug sa biya sa lawas sa mga piniriso magsagol ug kun dili kabanwasan dayon og tubig ang detention cell mangalisbo ang baho ngadto sa gawas.

Nagsugod ang kabaho sa buhatan sa kapolisan sa Mandaue niadtong pagbalhin sa merkado ngadto sa bag-ong nahimutangan niini karon.

Ang mga polis nga nadistino sa nahisgotang presinto nga nahinabi sa Banat News miingon nga kada adlaw magpahakot na lang sila og tubig nga aron ikabanwas sa prisohan.

Hinuon si Chief Inspector Jesus Elmer Fernandez nga maoy hepe sa maong presinto naningkamot karon sa pagpangita og sulosyon sa maong problema ug ila kining gipadangat ngadto kang Senior Superintendent Noel Gillamac.

Ang mga polis sa maong dapit gusto nga ibalhin ang ilang buhatan ngadto sa bag-ong merkado tungod kay abunda og tubig didtong dapita. (/WC) - BANAT NEWS