CEBU, Philippines - Mibahad ang kapolisan sa dakbayan sa Mandaue nga sikopon nila ang mga ginikanan nga di moatiman sa ilang mga anak. Ang maong bahad gipalanog ni Deputy Chief Ramil Morpos sa Investigative and Detective Management Bureau (IDMB kinsa nagkanayon nga may go-signal na kanila si Fiscal Felixberto Geromo sa piskaliya sa maong dakbayan kalabot niini.
Matud pa ni Morpos nga basta may igo lang silang ebidensya nga ang bata gipasagdan sa mga ginikanan niini, mahimo na nilang sikopon ang mga hingtungdan.
Usa sa bug-at nga suliran sa kapolisan sa maong dakbayan mao ang mga libud-suroy nga mga batan-on nga maoy sagad makamugna og krimen. Unya gumikan kay protektado sa balaod ang mga kriminal nga menor de edad walay mahimo ang kapolisan.
Matud pa ni Morpos nga nalatid nga probisyon sa Section 10 sa R.A 7610 kon Child Abuse law nga mahimo nang dakpon ug pasakaan og kiha ang mga ginikanan nga walay pagtagad sa kaugmaon sa ilang mga anak. Kundili makakawat, ang mga ginikanan pa usab ang motukmod sa ilang mga anak sa pagpakilimos aron makaluto sila og bugas.
Nabantayan usab ni Fernandez nga sagad sa mga menor de edad nga kawatan, mga manuyopay og rugby ug vulcaseal.
Busa napugos ang konseho sa Mandaue sa pagpatuman sa balaod nga silotan ang mga tindahan og rugby nga mobaligya niining butanga sa tag P2,000 sa unang higayon, P3,000 sa ikaduha ug P5,000 sa ikatulong higayon. ( /WC) - BANAT NEWS