CEBU, Philippines - Nasunog ang atubangang bahin sa awto sa usa ka abogado samtang kini nagdagan diha sa may M.L Quezon Avenue sa barangay Pajo, dakbayan sa Lapulapu kagahapon sa buntag .
Ang nahisgutang awto nga usa ka KIA pride nga may plakang GTS-877 gipanag-iya ni Atty .Ted Belarmia kinsa luwas nga nakagawas sa maong sakyanan.
Matud pa ni FO2 Climaco Salisid sa Lapu-lapu City Fire department nga nabantayan ni Belarmia pag-abot niini sa may M. L. Quezon nga dunay aso nga migawas diha sa dashboard sa iyang sakyanan ug pipila ka gutlo mi-spark na kini hinungdan nga iya kining gipadaplin.
Nataymingan nga stop signal na usab diha sa may Mactan Bridge ug niadtong panahona adunay nag-urong nga water tanker sa Clean and Green Program sa siyudad sa Lapu-lapu nga padung unta nga mamisbis sa mga tanom sa center island diha sa may M. L. Quezon.
Wala siya magduhaduha pagpangayo og tabang sa water tanker kinsa daling mipasirit og tubig sa iyang sakyanan maong napawong kini.
Dako ang pasalamat sa maong abogado nga nasalbar pa ang iyang mga personal nga butang nga anaa sa luyo sa iyang sakyanan. ( /EIM) - BANAT NEWS