CBCP mipahinungod og Santos nga Misa sa crash victims

CEBU, Philippines - Mipasiugda og Santos nga Misa ang Catholic Bishops’ Conference of the Philippines (CBCP) pinangulohan sa president niini ug Arsobispo sa Sugbo Jose Palma kagahapon diha sa Cebu Metropolitan Cathedral pahinungod sa mga nakalas sa plane crash sa Masbate.

Mitambong sa misa ang banay sa nakalas nga Sugbuanong pilotong si Capt. Jessup Bahinting pinangulohan sa nabiyuda niining si Margarita Bahinting bisan dili sila Romano Katoliko.

Samtang girepresentahan sa nagkadaiyang public officials ang alang kang Department of Interior and Local Government (DILG) Secretary Jesse Robredo ug ang co-pilot nga si Kshitiz Chand.

Si Palma midayeg kang Robredo sa serbisyo publiko niini sa buhi pa kini ug sa katapusang gibuhat niini sa Sugbu pipila ka minutos sa wala pa kini mamatay.

Matud sa Arsobispo nga ang mga testimoniya sa pamilya, katrabaho ug mga higala ni Robredo nagpakita sa tibuok nasud kung unsa ang pagkatawo ni Robredo.

I was touched when I learned that Secretary Robredo wanted to go home to his family. He’s indeed a family man,” matud sa Arsobispo.

The fact that his wake was held at Naga City Cathedral and knowing that the wife confesses three times a month shows their closeness to the church,” dugang pa sa Arsobispo.

Matud ni Palma nga si Robredo ug ang duha ka piloto maka-inspirasyon sa minilyong katawhan ug kinahanglang di kalimtan ug handumon ang ilang mga maayong nabuhat aron daghan pa ang mosunod kanila.

“They do not have to die. They should continue to live in our hearts,” matud sa Arsobispo.

Si Palma mihandum usab kang Capt. Bahinting isip usa ka maayong piloto sanglit usa siya sa gihatud niini sa Limasawa alang sa ikalimang sentenaryo sa Unang Santos nga Misa sa maong dapit, kauban nila sa flight si Margarita.

‘It was a nice flight. Both of them (magtiayong Bahinting) were very accommodating. I thought then that if a helicopter flight is always this nice, I should just ride a helicopter all the time,” sa Arsobispo pa.

Ang haya usab ni Robredo gihimo sa Malacañang nga gitambungan sa nagkadaiyang opisyal sa gobiyerno ug pipila kanila mibatbat og mga pulong pagdayeg sa pagkatawo sa kalihim.

Ang Civil Aviation Administration of the Philippines (CAAP) nagsugod na sa pag-imbestigar sa pagkahagsa sa Piper Seneca nga giluwanan sa mga nakalas diha sa Masbate.

Samtang gipangita pa gihapon ang usa ka makina sa maong abyon nga naunlod sa dagat nga gituohang maoy sinugdanan sa aksidente.

Gimando na usab ni Sec. Mar Roxas sa Department of Transportation and Communications ang pagpasuspenso sa CAAP sa operasyon sa Aviatour nga gipanag-iya ni Bahinting.

Lakip sa giingong suspensuhon ang flying schools niini nga dunay daghang mga tinun-ang piloto samtang gitino pa ang hinungdan sa aksidente.

Si CAAP director general William Hotchkiss III kinsa usa ka kanhi fighter pilot mibutyag sa report sa GMA News Online nga base sa uwahing pag-check sa emergency location transponder (ELT) naka-on kini sa wala pa mahitabo ang aksidente apan dihang na-rekober naka-off na kini maong wala dayon nila makit-i asa nahagsa ang abyon.

Nasuta usab nga uwahing na-inspeksyon sa CAAP ang ELT sa maong abyon niadto lang Nobiyembre 11, 2011, ang inspeksyon balido sulod sa usa ka tuig, sumala pa sa report.

Samtang gisalikway una ni Hotchkiss ang espekulasyong may sagol nga laing kemikal ang fuel sa maong abyon. Matud niya kinahanglan pa kining masusi. Apan ang Aviatour daan nang mipasabot nga higpit ang ilang regulasyon pagtuman sa hustong matang sa fuel nga gamiton sa matag abyon sa ilang kompanya. ( EIM)   - BANAT NEWS