Hugyaw nga ika-18 birthday sa Banat News

CEBU, Philippines - Nahimong sadya ug mabulokon ang pagsaulog kagahapon sa ika-18 nga anibersaryo sa pagkahimugso sa Banat News, ang igsuong pamantalaan sa The Freeman, Philippine Star, Pangmasa ug Pilipino Star Ngayon.

Ang selebrasyon gisugdan sa usa ka Santos nga Misa diha sa MGB Hall sa Philippine Star Building nga giselebrar ni Padre Dave Villaceran sa Cebu Metropolitan Cathedral.

Sa homiliya ni Padre Villaceran kini mipahinumdom sa katawhan nga ilabi na sa mga mamumuo nga bisan unsa ka gamay sa posisyon niini angayang dili niini kalimtang dako gihapon siya og papel sa kompaniyang gitrabahoan.

Matud pa niya walay kompanya nga usa ra ka tawo ang maglihok. Iya usab gidasig ang mga kawani sa pagpamalandong niining pagtulun-an nga: “Man is not for work, but work is for man.”

Human niini gisugdan na ang kasadya kinsa si Malou Inocando Tabar, copy editor sa The Freeman ang mihalad og upat ka mga kanta ug ang chief photographer nga si Ferdinand Edralin maoy miduyog kaniya og gitara.

Apan gawas sa kanta dunay paambit sa mga reporter, correspondent ug kolumnista kabahin sa ilang mga kasinatian sa pagsulod nila sa Banat News.

Si Bischikador ug Banat Hugyaw columnist nga si Yuri maoy host sa programa. Dili usab mawala sa selebrasyon ang raffles nga maoy nagpakulbahinam sa mga kawani.

Atol usab sa selebrasyon mibisita usab ang Greenwich Pizza nga mipaila sa ilang bag-ong Greenwich “overload” pizza nga dunay 13 ka mga lamiang toppings ug freshly baked dough.

Mihagit usab sila sa mga sakop sa Banat News og lumbaanay og kaon sa maong bag-ong produkto nga nakapadugang sa kalingawan nga gipasiugdahan ni Ma. Limbee Y. Alas ang Greenwich manager sa SM City Cebu.

Ang Publisher nga si Juanito Jabat ug ang Bise Presidente sa The Freeman ug Banat News nga si John Vicente Gullas mitambong usab sa kasaulogan.

Ang general manager usab sa kompaniya nga si Melandro “Boy” Mendoza ang nangulo sa pag-organisar sa kalihukan sa malampusong selebrasyon.

“Magulo siya (selebrasyon) pero masaya, nakakatuwa,” matud pang Mendoza. (EIM) - BANAT NEWS