2 mitulis sa PUJ nadakpan

CEBU, Philippines - Gitulis sa upat ka armadong lalaki ang mga pasahero sa usa ka jeepney alas-10 pasado ang takna sa miaging gabii sa dalan A.C. Cortes Avenue sa barangay Cambaro sa dakbayan sa Mandaue, apan walay swerte ang duha human maapsi sa mga polis.

Si PO1 Milven Pelayo sa kapolisan sa Presinto 5 sa Mandaue City Police Office (MCPO) miila sa mga nadakpan nga sila si Cristopher Batac, 18 ug J.R. Boyboy, 18, pulos taga barangay Looc sa maong dakbayan.

Matud pa ni PO1 Pelayo nga ang gitulis nga pasahero mao sila si Emiland dela Rama, 22, ug Michelle Endab, 34, nga gikuhaan sa ilang shoulder bags nga may sulod nga cellphones ug salapi.

Ang mga tulisan nanakay gikan sa Lapulapu City ug pag-abot sa nahitaboan kalit nga mideklarar og tulis dungan sa pagtion og armas.

Human makuha ang mga butang daling nanganaog ang upat ug nanglakaw kini paingon sa barangay Looc sa maong dakbayan ug sa gihimong followup operation nasikop ang duha. (/EIM) - BANAT NEWS