CEBU, Philippines - Kritikal ang kahimtang sa usa ka 22-anyos nga lalaki nga giunay og pusil sa iyang kaugalingong amahan tungod lang sa ilang panag-away nga nag-ilog sa sapatos diha sa sulod sa ilang balay sa sitio Bawod, barangay Magdugo siyudad sa Toledo alas 12:30 sa hapon niadtong Miyerkules.
Ang biktima nga nalandig sa tambalanan mao si Romnick Camantso, 22, nagpuyo sa maong lugar samtang ang suspek mao ang iyang amahan nga si Narciso Camantso Jr., 47.
Matud ni SPO4 Carmelito Hornales ang desk officer sa Toledo City Police Station dihang nahinabi sa Banat News namugos ang biktima og sul-ob sa sapatos sa iyang amahan tungod kay duna siyay lakaw apan wala mosugot ang suspek.
Tungod niini nagkalalis ang duha ug nag-away hangtud nga wala na makapugong ang suspek sa pagsukol kaniya sa anak ug mikuha og armas dayong pusil sa dughan sa biktima.
Human niini daling miikyas ang suspek samtang gidala sa inahan nga si Lorena Camantso sa Toledo City District Hospital ang anak apan tungod kay grabe ang samad gibalhin kini og tambalanan sa Sugbo.
Apan pagkaalas-5 sa hapon ang suspek mitahan sa iyang kaugalingon ngadto sa iyang ig-agaw nga tanod nga si Danilo Pardillo ug gidala kini sa kapulisan. - BANAT NEWS