Gibiyaang linung-ag miugdaw sa 7 ka balay

CEBU, Philippines - Pito ka panimalay ang gikaon sa kalayo tungod sa gibiyaang linung-ag pasado alas-9 sa buntag kagahapon diha sa barangay Poblacion lungsod sa Ginatilan.

Gikatahong nagsugod ang maong sunog diha sa panimalay ni Clemente Gaca, 70, usa ka retiradong magtutudlo nga nagluto og kan-on sa ilang abuhan ug gibiyaan kay nagpatupi sa barberuhan.

Gawas sa balay ni Gaca lakip sa gikaon sa kalayo mao ang panimalay nilang Elvira Yu, Anastacia Cabañog, Teodora Cabañog, Pria Ruiz ug Emma Chilby nga pulos ginama og light materials.

Samtang partially damaged usab ang panimalay ni Vicente Dumaboc. Matud pa ni SPO2 Arnold Omaña sa Ginatilan Police Station nga ang mga ginikanan sa mga tinun-an nga diha sa Cabatuan Elementary School maoy unang nakakita sa bagang aso nga naggikan sa panimalay ni Gaca. Gibana-banang mokabat sa P650 mil ang danyos niini. ( /EIM) - BANAT NEWS