Bahinting gisugat sa mga kabanay, tinun-an ug higala

CEBU, Philippines - Nabalik na sa Cebu ang patay’ng lawas ni Capt. Jessup Bahinting ang piloto ug tag-iya sa Piper Seneca plane nga nahagsa uban ni interior secretary Jesse Robredo ug ang Nepalese co-pilot niining si Kshitiz Chand. Alas 8:05 kagahapon sa buntag gikan sa Masbate Airport miabot sa Mactan-Cebu International Airport ang patay’ng lawas ni Bahinting agi sa General Aviation tarmac luwan sa RP-C 9980 usa ka 6-seater Beechcraft plane sa ChenAir Tours.

Ang pilotong si Capt. Marvin Abadiano ug ang tag-iya sa ChenAir nga si Herman Sarmiento maoy mikuha sa patay’ng lawas ni Bahinting sa Masbate, sila mga higala sa namatay.

Ang patay’ng lawas gisulod sa usa ka itom nga cadaver bag nga may markang Department of Health (DOH) imbes nga metal casket tungod kay dili masulod sa maong abyon.

Ang tibuok pamilyang Bahinting pinangulohan sa kapikas niining si Margarita, mga suod nga higala, ug mga kaubanan sa industriya misugat sa patay’ng lawas.

Lakip sa misugat ni Bahinting mao ang mga empleyado niini sa Aviatours ug ilang mga tinun-an uban sa mga opisyal sa gobiyerno nga suod usab ni Bahinting , usa niini si kanhi Cebu City councilor Sylvan “Jack” Jakosalem.

Ang mga tinun-an sa Aviatours mipadayag nga magpursige sila nga mamahimong batid nga piloto susama sa ilang magtutudlo nga si Bahinting. Usa kanila si Capt. Habib David Yakubu nga usa ka Nigerian ug usa sa Flight Instructors sa Aviatours kinsa maoy gisugo ni Bahinting sa pagkuha sa anti venom vaccine ngadto sa lalawigan sa Camiguin aron idapat sa napaakan og kobra nga si Ronaldo Aventurado.

“We’ve actually lost a very, very good pilot…he is a good person,” matud pa ni Yakubu pahinungod kang Bahinting. Si Bahinting gidala sa St. Peter’s Funeral Homes ug dad-on sa lungsod sa Ginatilan karong adlaw’ng Sabado aron ilubong sa adlaw’ng Lunes.

Samtang si Cebu City Mayor Michael Rama mipahibalong motunol og P100,000 nga hinabang sa pamilya ni Bahinting.   - BANAT NEWS