CEBU, Philippines - Usa ka babaye nga kanhi sakop sa City Traffic Operations and Management (CITOM) midangop sa buhatan sa Criminal Investigation and Detection Group (CIDG) ug mireklamo kay gitionan kuno siya og armas de fuego sa iyang kapuyo.
Ang mireklamo mao si Ana (ngalan gipugngan) 49, samtang ang iyang gireklamo mao ang iyang kapuyo sulod na sa tulo ka tuig nga si Ronald Tampipi nga mao kunoy mition kaniya og armas.
Si Ana misumbong sa mga tigbalita nga miadto siya sa balay sa iyaan ni Tampipi sa syudad sa Lapulapu sa miaging adlaw kay iyang gipangumosta human kini madawat sa pagka-polis
Apan sa iyang pagpauli maoy naabtan niya ang iyang bana nga busy kaayo sa paggamit sa iyang cell phone nga gituohan niya nga maoy hinungdan nga wala kini motubag sa iyang miss-call busa iya kining giilog ug gikuha gikan sa iyang kapuyo.
Gumikan niini matud pa ni Ana nga nagkalalis sila ug midagan siya dihang nakita niya nga nasuko na ang iyang kapuyo.
Apan gitawag siya niini ug sa iyang pagduol gitionan siya sa armas de fuego niini kay naglagot ngano kunong nagpunay siya og sunod-sunod kaniya (Tampipi) nga dili man sila minyo.
Busa nakahukom si Ana sa pagsumbong ngadto sa CIDG sa maong hitabo.
Gibuyboy ni Ana si Tampipi kay human niya kini tabangi nga mahimong polis, wala magpasalamt kaniya ug wala moila sa utang kabubut-on niini.
Ang Banat News misuway sa pagtawag sa Marigondon Police Station 4 aron kuhaan og habig si Tampipi apan wala kini ma-kontak tungod kay nag-field.
Apan si PO1 Michael Copias sa Police Station 4 mikonpirmar nga nadestino si Tampipi sa maong buhatan. – BANAT NEWS