CEBU, Philippines - Masaligon ang Department of Interior and Local Government (DILG-7) nga dili maapektohan ang mga nasugdang proyekto ni Interior Secretary Jesse Robrero luyo sa kalit nga kamatayon niini.
Kini tungod kay matud ni DILG-7 Regional Director Ananias Villacorta nga sagad sa nasugdang programa ni Sec. Robredo dinhi sa Central Visayas nasugdan na ug ang uban mahimo mang ipadayon sa iyang undersecretary.
Usa sa gitumbok ni director Villacorta mao ang Ligtas na Tubig program nga gigahinan og P7 milyones alang sa 75 ka mga local nga kagamhanan dinhi sa rehiyon.
Nasayran nga ang unang katunga sa maong gahin na release na alang sa local nga kagamhanan nga nakapasar sa programa nga seal of good governance.
Apan giangkon ni director Villacorta nga dakung kawad-on sa ilang ahensiya ug sa gobyerno ang kamatayon ni Sec. Robredo nga gihulagway nila nga usa ka tarong ug ligdong nga pagkatawo ug lig-on kaayong kaabag sa kampanya sa kasamtangang administrasyon pagpatuman sa tarong ug makiangayon nga pang gobyerno.
Nunot niini usa ka santos nga misa ang gipahigayon sa buhatan sa DILG-7 kagahapon sa alas 10:00 sa buntag nga gitambungan sa tanang mga kawani sa DILG gikan sa siyudad sa Sugbo, Probinsya, Mandaue ug Lapulapu City nga gipahinungod sa malinawong pagtaliwan sa DILG secretary.
Si director Villacorta midugang nga si anhing DILG secretary Robredo kugihan kaayo ug giangkon nila nga tumang kaguol ang ilang gibati dihang nahibaw-an nila ang balita nga nakit-an na ang patay’ng lawas niini sulod sa tulo ka adlaw nga wala kini igkita human mahagsa ang abyon niining gisakyan didto sa kadagatan sa Masbate. – BANAT NEWS