CEBU, Philippines - Napalgang patay ang usa ka inmate sa Cebu City Jail atol sa head count nga gipahigayon kagahapon pasado alas 6:00 sa buntag.
Si Francis Obiso, 31, nga taga dalan Tupas, sa barangay San Nicolas, dakbayan sa Sugbo napalgan sa mga kadagkoan sa prisohan nga wala nay kinabuhi nga nagbuy-od sulod sa iyang selda.
Si Cebu City Jail warden Johnson Calub mibutyag sa Banat News nga niadtong Martes sa alas 6:00 daan na nga mireklamo si Obiso bahin sa gipamati niya sa lawas ug gani nagpunay kini og suka ug luya kaayo ang lawas.
Tungod niini, gidala nila si Obiso sa ilang clinic aron matagad sa ilang nurse ug gani, gihatagan kini og tambal aron mahunong ang iyang pagsuka.
Gawas niini, gihiling usab sa nurse ang lawas sa maong piniriso apan natan-aw sa mga kadagkoan sa City Jail nga dili ra kaayo grabi ang iyang kahimtang
Hinuon namatngonan nila nga naglisud kini sa pagginhawa busa gisuplayan na lang kini og oxygen.
Sa pagka-alas 9:00 sa gabii sa maong adlaw gipabalik na sa iyang lawak sa psychiatric ward sa city jail si Obiso.
Apan kagahapon sa buntag matud pa ni Calub nga dihang mihimo sila og headcount, kuwangan na ang mga piniriso ug dihang ila nang gisusi didto na nila kini hikit-I sa daplin sa lawak nga nagbuy-od ug wala na magginhawa hinungdan nga gihatud dayon nila ngadto sa Cebu City Medical Center diin kini ideklarar nga dead on arrival. Dugang pa ni Calub nga ilang gihangyo ang pamilya sa biktima nga ipaubos sa autopsiya ang patay’ng lawas sa biktima kini aron gayud masayran ang hinungdan sa iyang kamatayon.
Sumala ni Calub nga si Obiso napriso niadtong Hunyo 2007 tungod sa mga kasong frustrated murder; attempted murder; murder ug kalapasan sa RA 8294.
Si Obiso didto ipaslak sa psychiatric ward tungod sa problema niini sa pangisip. – BANAT NEWS