Mga sapa sa Toledo gimonitor sa MGB

CEBU, Philippines - Ang Mines and Geosciences Bureau (MGB-7) nag-umol og Multipartite Monitoring Team (MMT) usa ka proyekto alang sa Industrial Sand and Gravel (ISAG) kalabot sa upat ka dagkong sapa sa siyudad sa Toledo. Kini gipadayag ni MGB-7 Regional Director Loreto Alburo human aprobahi ang resolusyon niadtong Agosto 3 ning tuiga nga nag-organisar sa MMT.

Ang upat ka mga sapa nga gipahinungdan niining maong proyekto mao ang Sapangdaku, Maypay, Abayan, ug Guinguiotan, nga pulos nahimutang sa dakbayan sa Toledo.

Sumala ni Alburo nga kining komposisyon sa MMT maoy pagtuman sa Section 185 sa Department Administrative Order (DAO) 2010-21 sa Republic Act 7942 o ang Philippine Mining Act of 1995.

Ang maong balaod nagbuot nga kinahanglan ang pagpangubkob sa bas ug graba sa maong mga sapa itugot lamang sa mga operator nga may permiso. (Liezl M. Frasno-Correspondent/WC) (BANAT)