Breastfeeding program ilusad karon sa SM
CEBU, Philippines - Ilusad karong alas 10:00 sa buntag ang National Breastfeeding Awareness Month, usa ka programa nga gipasiugdahan sa National Nutrition Council (NNC)7 nga ipahigayon sa SM City Social Hall.
Si NNC7 Officer Parolita A. Mission mibutyag nga ang maong programa gituyo sa kagamhanan aron padasigon ang mga inahan sa pagpasuso sa ilang mga masusong anak.
Matud pa ni Mission nga nasuta sa ilang mga survey nga kasagaran sa mga inahan misagop na sa bottle feeding o paggamit sa gatas nga gibaligya sa mga tindahan alang sa ilang masusong mga anak.
Gisaysay ni Mission ang kamahinungdanon sa gatas sa inahan nga maoy lig-ong proteksyon sa mga batang gagmay gikan sa nagkalainlaing matang sa balatian.
Kini tungod kay ang gatas sa inahan puno sa sustansya nga sakar kaayo sa gikinahanglan sa batang masuso.
Sa paglusad niining maong programa karon ipabati usab ni Mission ngadto sa tanang mga inahan nga nagtrabaho nga gipaluyohan na sila sa balaod nga nagmando sa ilang trabahoan paggahin og lawak alang sa mga inahan nga magpasuso sa ilang mga gagmay’ng anak. (Liezl M. Frasno-Correspondent/WC) (BANAT)
- Latest
- Trending
