CEBU, Philippines - Mokabat sa P2.3 milyones nga financial assistance ang gipang-apud-apod ni Gobernador Gwendolyn Garcia ngadto sa mga opisyales sa dakbayan sa Toledo sa iyang pagbisita sa nahisgutang dapit niadtong Lunes, usa ka piyesta opisyal nga adlaw.
Ang maong hinabang gigahin alang sa nagkalainlaing proyekto sa kabarangayan sa dakbayan sa Toledo. Ang mga barangay kapitan sa maong dakbayan nakadawat og tag P50 mil alang sa ilang mga proyekto.
Samtang si Toledo City Mayor Aurelio Espinosa mao usab ang nangunay sa pagdawat sa P800 mil nga bahin sa maong hinabang financial alang sa tukorong Senior Citizens Building sa naasoy nga dakbayan. Sila si Mayor Espinosa ug Vice Mayor Arlene Zambo mapasalamaton kaayo sa subli nga pagbisita sa governor ug ni Cebu Third District Congressman Pablo John PJ Garcia.
Ang mga board member sa ikatulo nga distrito sa lalawigan sa Sugbo nga sila si Board Member Alex Binghay ug Ian Zambo kauban usab sa gobernador ug ni Cong.PJ sa pag-apud-apod sa nahisgutang hinabang salapi. (Chester Abadilla/WC) (BANAT)