CAIB nangronda sa mga imnanan

CEBU, Philippines - Ang Cebu City Anti-Indecency Board (CAIB) nga gipangulohan ni Dr. Lucille Mercado mipahimangno sa tanang namatigayon og imnanan nga angay motuman sa balaod kalabot sa pagpasulod og mga customer sa ilang mga establisamento.

Sumala pa ni Mercado nga ubay-ubay sa mga menor de edad nga mga tinun-an ang nag-inom atol sa kinalit nila nga pag-inspeksyon sa pipila ka mga imnanan sa dalan Sanciangco ning dakbayan sa Sugbo sa miaging gabii.

Matud pa ni Mercado nga gipagawas nila ang maong mga tinun-an gikan sa maong mga establisamento ug giwarningan nila ang mga tag-iya sa maong mga imnanan nga dili magpanuko ang kagamhanan sa pagpahamtang og silot kanila gawas kun tumanon nila ang balaod.

Base sa balaod gidili sa mga imnanan ang pagpasulod og mga palahubog nga menor de edad o nagpanuigon og 21 anyos paubos.

Ang multa nga ipahamtang sa mga establisamentong molapas sa balaod mao ang             P5,000 alang sa matag menor de edad nga pasudlon nila aron  maglala o mag-inom og bino nga makahubog sa sulod sa ilang tindahan.

Midugang sa pagpasidaan si Mercado nga sa higayong gahi gyud og ulo ug dili gyud motuman sa balaod ang tag-iya sa usa ka imnanan, mapugos ang CAIB sa pagrekomendar   nga tak-opan ang maong tindahan.

Mibahad si Mercado nga sagunsonon na nila ang paglusad og kinalit nga inspection sa mga imnanan aron masuta kun kinsay mga tindahan nga gahian motuman sa balaod.

Gihimo sa CAIB ang surprisa nga pagpangronda human sila makadawat og report kalabot sa daghang mga imnanan nga kuwarta ray gisiguro kay bisan mga batan-on kaayo pasudlon na aron mag-inom.

Apan si Mercado misaysay nga dili unta angay nga huna-hunaon ang kuwarta kundi ang kaayohan sa mga batan-on ilabi na ang mga estudyante.

Matud pa niya nga ilang istriktohon ang   pagpatuman sa lagda aron nga dili maapektohan ang pagtungha sa mga tinun-an kansang ubang mga ginikanan nalubong na sa utang ug halos dili na makapalit og purol ang ubang mga amahan kay ang kuwarta kuwang ra sa gasto sa ilang mga anak. (Sanden J. Anadia/WC) (BANAT)