Tindahan sa Kawasan falls gub-on sa tag-iya

CEBU, Philippines - Misaad ang mga negosyante sa Kawasan Falls nga gub-on nila ang ilang mga tindahan sa palibot sa maong busay sa lungsod sa Badian.     

Kini human sila pasabta nga illegal gayud ang pagkatukod sa mga estraktura sa daplin sa Kawasan falls.

Si Director Isabelo Montejo sa Department of Environment and Natural Resources (DENR) 7 maoy mipasabot sa mga hingtungdang tag-iya sa mga tindahan sa palibot sa busay.

Sa usa ka tigum nga gipatawag ni Gov. Gwendolyn Garcia nga gitambongan usab sa mga opisyales sa lungsod sa Badian ug mga tag-iya sa mga tinukod nga mga tindahan sa palibot sa busay didto ipadayag sa gobernador nga dili angay itarok ang maong mga estraktura sa maong lugar kay makadaot kini sa kinaiyanhong katahom niini. 

Samtang si Director Montejo kinsa mitambong usab sa maong miting mitataw nga sigun sa survey sa iyang mga tawo sa maong lugar nasuta nga nasulod ang uban nga structure sa 20 metros nga gitawag nga environmental protection zone.

Hinuon misaad ang mga tag-iya sa mga tindahan nga ila kining gub-on aron matuman ang balaod.

Gani ilang nasabutan ang pagpakigtambayayong sa gobernador sa mga programa nga alang sa Kawasan falls ilabi na ang pagpaanindot niini.

Ang saad sa gobernador gihangop sa mga negosyante nga nagpadagan og mga balay patigayon sa Kawasan Falls ilabi na sa mga opisyal sa Kawasan Nature Park Multipurpose Cooperative. Sa Septembre 17, gitakda sa gobernador nga magmiting sila pag-usab alang sa mga programa nga ilusad didto sa maong lugar nga pasiugdahan sa Kapitolyo. (Chester Abadilla/WC) (BANAT)