Tulo ka tawong natulog gipamusil patay

CEBU, Philippines - Tulo ka mga tawo ang gipamusil patay sa nagmaskarang lalaki samtang ang mga biktima nangatulog ilawom sa punoan sa mangga gawas sa pinuy-anan sa gidudahang druglord sa barangay Dayhagon sa lungsod sa Medillen kagahapon sa alas 3:00 sa kaadlawon.

 Ang mga biktima mao sila si Joel Bañares,30, taga sitio San Vicente barangay Don Pedro, Bogo City, ang ikaduha mao si Maki Verallo, taga Pulangbato, Bogo City ug ikatulo si Benjie Piamonte, 26, taga barangay Dakit, Bogo City.

Matud pa sila si Bañares ug Verallo mga handlers sa manok igtatari sa ilang amo nga si Lowell Dimaymay kinsa gipasanginlang druglord sa lugar. Samtang ang suspek gihulagway lang sa saksi nga usa ka lalaki nga nagtaptap sa nawong ug nag-jacket og itom ug nag-shorts lang sakay og motor. Matud ni SPO4 Carlos Condeno, imbestigador sa Medillen Police dihang nahinabi sa Banat News samtang nangatulog ang tulo miduol ang kriminal ug gitagsatagsa og pamusil ang mga biktima. Ang asawa ni Bañares nga si Era nakakita og usa ka lalaking nagdali og ikyas. Si Era diha sa terasa sa balay natulog ug daling nakasinggit pagpangayo og tabang.

Si Bañares naigo sa liog, si Verallo naigo sa ulo ug nilapos ang bala sa luyong bahin niini samtang si Piamonte naigo sa dunggan nga nilapos sa walang bahin sa ulo ang bala.

Ang kapulisan naka-recover og mga basiyo sa kalibre .45, si SPO4 Condino nagkanayon nga anggulo sa gidiling drugas ang gitutukan karon nga posibleng motibo sa pagpamusil sa nagpadayong imbestigasyon.

Matud pang Condeno gipaubos nila sa surveillance ang agalon sa mga biktima tungod sa kalambigitan sa ginadiling drugas. (Darrel A. Carumba/EIM)  (BANAT)